• Кыргызстанда ӨРТ КЫРСЫКТАРЫНАН жыл башынан бери 38 адам каза тапты. Бул тууралуу Өзгөчө кырдаалдар министрлиги кабарлайт.
  
  
• 2015-жылы чет элдик үй-бүлөлөр кыргызстандык 19 БАЛАНЫ ал эми кыргыз үй-бүлөлөрү 707 баланы асырап алышкан. Бул боюнча Мамлекеттик статистикалык комитет маалымдайт.
  
  
• Өкмөттүн алдындагы Жаштар иштери, дене тарбия жана спорт мамлекеттик агенттигинин директору болуп КАНАТ АМАНКУЛОВ дайындалды.
  
  
• Жайкы эс алуу сезонуна карата БИШКЕК-БАЛЫКЧЫ-БИШКЕК ПОЕЗДИ 17-июндан тарта "Бишкек I" станциясынан жума, ишемби жана жекшемби күндөрү каттай баштайт. Жөнөө убактысы жергиликтүү убакыт боюнча таңкы 6:25те. Бул тууралуу "Кыргыз темир жолу" ишканасынын сайтында маалымдалат.
  
  
• Кыргызстанда тамеки кутуларынын сыртына чапталган коркунучтуу сүрөттөр ТАМЕКИ ТАШТООНУ үгүттөөдө натыйжасыз. Мындай пикирин атайын сурамжылоого катышкандардын 77 пайызы билдирген. Изилдөөнү "Долбоорлор лабораториясы" борбору жүргүзгөн.
  
  
• Кытайда 6 жыл аралыгында 16 КЫРГЫЗ ЖАРАНЫ өмүр бою эркинен ажыратылган. Бул тууралуу бүгүн Тышкы иштер министрлигинин басма сөз кызматынан билдиришти.
  
  
• Кыргызстанда кылмышты моюнга алуулардын 90 пайызы КЫЙНООЛОРДОН кийин ишке ашат. Бул тууралуу Кыйноолорду жана башка катаал, адамгерчиликсиз же кадыр-баркты басмырлаган мамиленин жана жазанын түрлөрүнүн алдын алуу боюнча борбору маалымдайт.
  
  
• КЫРГЫЗСТАН Global Peace Index (Тынчтыкты сүйүү глобалдуу индекси) боюнча 163 мамлекеттин арасынан 124-орунду ээледи. Тынчтыкты сүйгөн алдыңкы өлкө Исландия экени белгилүү болду. Коңшу Казакстан аталган индексте 75-орунду ээлеген. Иликтөө өлкөлөрдүн коңшулар менен мамилелери, ички жана тышкы согуштары, террордук акттарды эске алуу менен жүргүзүлгөн. Эң акыркы орунда Сирия экени маалым болду.
  
  
• Кыргызстандагы МУЗЕЙЛЕРГЕ 2015-жылы 700 миңден ашуун адам барган. Бул боюнча Мамлекеттик статистикалык комитет маалымдайт.
  
  
• "Тазалык" муниципалдык ишканасына шаар ичиндеги ТАШТАНДЫЛАРДЫ жыйноочу 32 атайын унаа Европа биримдигинин делегациясы жана Европа реконструкция жана өнүктүрүү банкы тарабынан берилди. Бул тууралуу Бишкек шаардык мэриясынын басма сөз кызматы кабарлады.
  
  
• Ички иштер министрлигинин Ош шаары жана Ош облусу боюнча башкы башкармалыгынын башчысы СҮЙҮН ӨМҮРЗАКОВ Ички иштер министринин биринчи орун басары болуп дайындалды.

Мирлан Өмүралиев
politika@super.kg