Орусия өзүнүн аймагы аркылуу Украинанын товарларын кыргыз мамлекетине алып өтүүгө тыюу салды. Буга чейин 2016-жылдын 1-январында Орусия Казакстанга украиналык товарларды өткөрүүгө тыюу салган болчу.
Импорттон көз каранды болгон кыргыз тарапка да мындай тыюу салуу залалын тийгизбей койбойт. Маалыматтарга ылайык, 2014-жылы кыргыз-украин соода алмашуусунун көлөмү 120 миллион долларга барабар болсо, Орусия-Украина мамилелеринин чыңалышынан улам 2015-жылы соода алмашуунун көлөмү 70 миллион долларга чейин азайган.
Кыргызстан эң ириде кант жана кондитер азыктарын Украинадан импорттойт. Экономисттердин айтымында, Кыргызстан өзүнүн продукциясы менен кантты 20 пайызга гана камсыздай алат. Калган 80 пайызын сырттан сатып алат. Орус президентинин жаңы буйругунун күчүнө кириши менен өлкөдө баалардын көтөрүлүшү толук ыктымал, себеби Украина Кыргызстан эң көп товар импорттогон Орусия жана Казакстандан кийинки өлкө.