Аскерге чакырыла турган жарандар өлкөдөн тышка чыгуусуна убактылуу тыюу салынышы мүмкүн. Мындай токтомду Коргоо иштери боюнча комитети сунуштап жатат. Негиздемеге ылайык, республикада түзүлгөн ички жана сырткы миграциялык жагдай каттоодон чыкпай туруп башка аймакка же өлкөдөн чыгып кетип, жарандардын аскердик кызматка чакыруудан качуусуна шарт түзүүдө деп түшүндүрүлөт. Коргоо иштери боюнча комитетинин өкүлү Руслан Абдрахманов бул токтом Конституцияга каршы келбей турганын билдирди. "Кыргыз Республикасынын жарандарынын жалпыга бирдей аскердик милдети жөнүндө" мыйзамына ылайык, жарандарга аскердик кызматка чакыруунун мөөнөтүн узартуу чакыруу комиссиясынын чечими үй-бүлөлүк шарттары боюнча, билим алуусун улантуу үчүн жана ден соолугунун абалы боюнча гана берилет. Конституцияда жарандардын укуктарынан тышкары милдеттери да белгиленген. Ата Мекенге кызмат кылуу – негизги милдеттеринин бири",- деди Р.Абдрахманов. Ошондой эле бул токтомдун долбоорун кабыл алуу республикалык бюджеттен акча каражаттарын кошумча бөлүүнү талап кылбай тургандыгын кошумчалады.

Адилет Керимбек уулу
politika@super.kg