Кыргыз өлкөсүнүн Тышкы иштер министрлиги Кадыржан Батыровдун сөз сүйлөө үчүн Европа коопсуздук жана кызматташтык уюмун аянтча катары пайдаланганына нааразы. Ал акыркы 5 жыл ичинде Швецияда жашап жатканын айтып, 20-сентябрь күнү Польшада ЕККУнун жыйынында өзүнө карата жаңы кылмыш иши козголгондугу боюнча бийликтин аракеттерине нааразы экенин билдирген. Эске салсак, Кадыржан Батыров 2010-жылдагы Ош коогалаңына байланыштуу этностор аралык кагылышууну уюштурууга айыпталып сыртынан өмүр бою эркинен ажыратылган жана издөөгө жарыяланган.
31-августта президент Алмазбек Атамбаев аянтта сүйлөп жатып "Кадыржан Батыровду ким качырганы да ачылат" деген эле. 14-сентябрда мамлекет башчы Башкы прокуратурага Батыровдун чет өлкөгө чыгып кетүүсүнө Убактылуу өкмөт мүчөлөрүнүн тийиштиги бар-жогун иликтөө максатында комиссия түзүүнү тапшырган.
Өмүрбек Текебаев 19-сентябрда Убактылуу өкмөттө өлкөдөгү тынчтык үчүн Алмазбек Атамбаев жооптуу болгонун, ал декретти расмий булактардан бирөөлөр атайын алып салышканын айтты. Кийинчерээк депутат биздин редакцияга ошол токтомдун көчүрмөсүн берди. Андан 2010-жылдын 23-апрелинде кабыл алынган документке ылайык, Кыргыз Республикасындагы коопсуздук жана тартипти сактоо боюнча түзүлгөн комиссияга Алмазбек Атамбаев төрага болгонун көрүүгө болот. "Ага ошол убакта бардык ыйгарым укуктар берилген, финансылык да, кадрдык да... Эгерде өлкөдө бир окуя болсо, анда Атамбаев башы менен жооп бериши керек эле",- дейт башкы "ата мекенчи".

Бектур Токтоноев
politika@super.kg