Сиз жайы менен колуңуз бошобой очоккана, времянка, гараж же сарай салууга жетишпей калдыңыз дейли. Бирок алар зарыл болууда. Кантип аны батыраак тургузууга болот? Бул жаатта бат бүтүүчү жана арзанга туруучу курулуш түрү бар. Ал өлкөбүзгө жаңыдан жайылып жаткан кадимки жашылча-жемиштер салынуучу жашиктер менен тургузулуучу курулуш. Мына ушундай курулуштун ээлеринин бирине жолугуп, маалымат алдык.

"9-10 КҮНДӨ ТУРГУЗУУГА БОЛОТ"

Нурлан Токтокожоев, Бишкектин Ак-Ордо конушунун тургуну, 47 жашта:
– Мен учурда очокканамдын үстүн жаап бүттүм. Анын дубалы үчүн желим жашиктерди колдондум. Мындай курулушту өзүм жашаган конуштагы бир адамдын үйүнөн көргөм. Көрүп, эмнеге мен очоккананы ушинтип тургузсам болбосун деп ойлогом. Анан жашиктерди чогултуп, кум-цемент дегендерди алып ишке кириштим. Негизи мындай курулуш өтө бекемдиги, дубалынын сыртынын көчпөстүгү, кышта жылуу, жайында салкын болуп, бат бүткөнү жана арзанга турушу менен айырмаланат экен. Пайдубал кургагандан кийин ылай ачытып алып, жашиктерди коюп, ичин ылай менен толтуруп кете бересиң. Ылай кургасын деп күтүп отуруунун зарылдыгы жок. Анткени дубалдын бети жашиктердин кырларынан улам цементтей бекем болуп, дубалдын формасы бузулбайт. Узуну 5, туурасы 3, бийиктиги 2 метр келген очоккананы 2 адам тынбай иштесе 9-10 күндө бүтүрүп коёт. Мисалы, бизге, 2 адамга пайдубалын тургузганга 3 күн, дубалын койгонго 2 күн, чатырын жапканга 2 күн кетти. Эми кум шыбакка дагы 1-2 күн керек. Анан терезе-эшигин орнотууга, пол салууга киришем.

ОЧОККАНАГА 28 МИҢ СОМ КЕРЕКТЕЛДИ

Узуну 5, туурасы 3, бийиктиги 2 метр келген очоккана үчүн кеткен чыгымдар:

1. Пайдубал үчүн

• Цемент – 5 мүшөк. 1 мүшөгү – 300 сом. 300x5=1500 сом
• Таш – 1000 сом
• Кум – 1000 сом

2. Дубалы үчүн

• Желим жашик – 400 даана. 1 даанасы – 10 сом. 400 x10=4000 сом
• Топурак – 2000 сом (15 тонна )
• Саман – 3 түк. 1 түгү – 80 сом. 80x3=240 сом

3. Шыбы үчүн

• Гипсокартон – 5 даана.1 даанасы – 260 сом. 260x5 сом=1300 сом
• Пенопласт – 5 даана. 1 даанасы – 115 сом. 115x5 сом=575 сом

4. Чатыры үчүн

• Торсун (балка), чатыр устун, ичке тактай (рейка) – 3500 сом
• Шифер – 13 даана. 1 даанасы – 280 сом. 280x13=3640 сом

5. Ичи-тышына кум шыбак үчүн

• Кум – 4000 сом (7 тонна)
• Цемент – 2 мүшөк. 300x2=600 сом

6. Терезе, эшик үчүн

• Мурунку колдонгону – болжол менен 5000 сом
• Жаңылары – 8000-9000 сом

Жалпы чыгым – 28 355 сом (эшик-терезеси мурун колдонулганы)

Эгер өзүңүз үйдөгүлөр менен тургузсаңыз, албетте, устанын акысына төлөнчү акча өзүңүздө калат.
Эгер 2 адамды акыга жалдасаңыз, анда 40 000-45 000 сом кетет. Полун кааласаңыз цементтеп же башкадан жасап ала бересиз.

Канымжан Усупбекова
kenesh@super.kg