Милан Жанибекованын модель чөйрөсүнө аралашканына 2 гана жыл болду. Аны келишкен келбети, ажарлуу жүзү аз убакыт ичинде таанымал моделге айлантты. Каарманым сулуулугуна манчыркап керсейген кыздардан эмес, жөнөкөй, ачык-айрым, позитивдүү бийкеч экен.

Туулган жылы, күнү – Сыр тутат
Туулган жери – Бишкек шаары
Бою – 175 сантиметр
Параметри – 85-64-90
Билими – Медиа жана дизайн мектебинде окуйт.
Бойдок, үй-бүлөдө эжеси жана иниси бар
Жетишкендиктери – "Бишкек сулуусу-2015", "Кыргызстан сулуусу-2016" сулуулар сынагынын жеңүүчүсү
Тартылган клиби – Омардын "Сен" аттуу клиби
Кызыгуусу – Сүрөт тартуу, ди-джейлик

– Милан, балет мектебин бүтүргөнүң менен, моделдикке ооп кетиптирсиң...
– Мен 5 жашымдан баштап балет дүйнөсүнө аралаштым. Бий искусствосу мага өзгөчө керемет көрүнүп, дасыккан балерина болгум келчү. Бирок балет мектебин бүтүргөндөн кийин бул жаатта өсүп, уланткым келген жок. Себеби бой жетип, токтолуп калгандан кийин балерина кесиби меники эместигин түшүндүм.

– Моделдик чөйрө эмнеси менен кызыктырды?
– Модель болом деген деле ой жок болчу. Болгону мага кызыккан фотографтар, моделдик агенттиктер интернет аркылуу чакыра башташты. Башында "менден кайдагы модель чыкмак эле?" деп баш тартып жүрдүм (күлүп). Бир жолу макул болуп фотосессияга катышкандан кийин бул дүйнө мени өзүнө тартып алды.

– Мода көргөзмөсүнө чыгуу үчүн канча төлөшөт?
– Негизи 500 сомдон 1,5 миң сомго чейин төлөшөт. Аябай чоң гонорар алып көрө элекмин, буюрса, баары алдыда деген ойдомун (күлүп). Ал эми фотосессия үчүн 5 миң сом алам.

– Фотосессиялар, мода көргөзмөлөрү көп убакытты алат да. Окууңа кантип жетишип жатасың?
– "Каалооң күч болсо баарына жетишесиң" деген сөз бекеринен айтылбаптыр. Менин оюмча, мындан да көп нерсени жасай алмакмын. Убакытты туура пайдалануу менен баарына жетишип келем. Казакстанда моделдик чөйрө жакшы өнүккөн. Ал жактан фотосессияларга чакыруулар түшкөндө барып турам. Моделдик мен үчүн азырынча хобби. Дасыккан модель болуу үчүн чет өлкөгө кетиш керек.

– Көпчүлүк моделдер "мода көргөзмөлөрдө көрө албаган кыздар кыянаттык кылып туфлиңе тикенек салып, көйнөгүңдү тытып коюшат" дешет....
– Кыздар мага кандай жардам бергенин өзүңүз көрдүңүз го. Биз бири-бирибизге жардамдашабыз. Балким, башка модель кыздарда ошондой болсо керек. Менин айланамдагылардын баары боорукер, кең пейил кыздар.

– Чет өлкөдөн сунуштар түшүп жатабы?
– Казакстан, Украина, Орусия, Түркиянын моделдик агенттиктеринен сунуштар түшүүдө. Дубайдан да стажировкадан өтүү боюнча чакыруу келди, буюрса, кышында барып келем.

– Келбетиңе кантип кам көрөсүң?
– Азырынча спорт залга бара элекмин, жакында барам (күлүп). Мен өзүн караган кызды сулуу деп эсептейм. Сулуулук бетиңе сыйпалган "Dior" фирмасынын тоналдык креми эмес. Менин көз карашым боюнча сулуулук – биринчи кезекте тазалык, тыкандык, ден соолуктун саламаттыгы.

– Ата-энең бул жаатта иштегениңе каршы эмеспи?
– Ата-энем заманбап адамдар. Алар эмне менен алектенгим келсе каршы чыкпай, дайыма колдоп турушат.

– Сулуу кыздын күйөрман жигиттери көп болсо керек?
– Көптүгүн байкай элекмин. Себеби жүрөгүмдүн ээси бар, аны аябай жакшы көрөм.

Динара Абдыкадырова
star@super.kg

(Сүрөттөр каармандын өздүк архивинен алынды)