Депутат Мирлан Бакиров 600дөй туюк туяктуу жаныбар Кытайга экспорттолду деген маалыматты укканын Жогорку Кеңештин Агрардык саясат, суу ресурстары, экология жана аймактык өнүгүү боюнча комитетинде билдирди. Бул экспорттолгон жаныбарды ветеринардык коопсуздук кызматынан сурай келгенде алар "жогорудагы жаныбар – эшек" деген жообун беришкен. Эл өкүлү бул маалымат боюнча: "Эшек экспорттогонубуз бизге аброй алып келбейт. Биз кызматташып келген араб өлкөлөрү үчүн бул жагымсыз маалымат болот. Кытайга эмнеге бодо мал же кой-эчки экспорттолбойт да, эшек экспорттолот?"- деп кескин сынга алды. Айрым маалыматтар боюнча, экспорттолгон эшектердин саны мындан 3-4 эсе көп болушу мүмкүн. Бул жагдай тууралуу Ветеринардык жана фитосанитардык коопсуздук боюнча мамлекеттик инспекция Кытай менен расмий макулдашуу бар экенин билдирди. Мындай окуя биринчи жолу катталган жок. Буга чейин Кыргызстанда иштеп жаткан "Монблан Трейд" жана "Во Ви Щы" ишканалары эшек соодасын жүргүзүп келген. Өлкө аймагынан бир нече ирет союлган эшек териси жана жүздөгөн эшек багылган жерлер белгилүү болгон эле.

Бектур Токтоноев
politika@super.kg