• Бишкекте 3-ноябрда Шанхай Кызматташтык Уюмуна мүчө өлкөлөрдүн өкмөт башчыларынын САММИТИ өтөт. Ага байланыштуу Бишкек шаарында 30-октябрдан 8-ноябрга чейин коопсуздук чаралары күчөтүлөт.
  
  
• 21-августта жоголду деп ИЗДЕЛИП жаткан 15 жаштагы Айпери Сүймөнкул кызы Казакстандан табылды.
  
  
• Кыргыз мамлекети кайрымдуулук боюнча дүйнөлүк рейтингде 140 өлкөнүн арасынан 34-орунду ээледи. Жыйынтыкты британиялык CAF КАЙРЫМДУУЛУК фонду жарыялады.
  
  
• Тергөө учурунда же үй камагында кармалган ДЕПУТАТТАРГА айлык берүүнү токтото турууга Жогорку Кеңеш макул болду.
  
  
• БШКнын төрайымы Нуржан Шайлдабекованын айтымында, жергиликтүү кеңештердин шайлоосу менен РЕФЕРЕНДУМДУ өткөрүүгө 135 миллион сомго чейин каражат сарпталат.
  
  
• Өлкөдөгү дээрлик бардык КОЛОНИЯЛАР оңдоого муктаж. Бул тууралуу Жазаларды аткаруу кызматынын башчысы Таалайбек Жапаров айтты.
  
  
• Ош шаарында 26-октябрда КЫРГЫЗ-ӨЗБЕК өкмөт өкүлдөрүнүн жолугушуусу болуп өттү. Жыйынтыгында эки тараптуу маданий-гуманитардык жана билим берүү кызматташтыгы боюнча меморандумга кол коюлду.
  
  
• Эмгек жана социалдык өнүктүрүү министрлигинин билдиришинче, 7-ноябрь – Улуу Октябрь Социалисттик революциясы күнү болгондуктан, ЭС АЛУУ КҮНҮ деп жарыяланды.
  
  
• ЭЛЬВИРА САРИЕВА өз ыктыяры менен Билим берүү жана илим министрлигинин башчылыгынан кетүү боюнча арыз жазды. Президент бул боюнча жарлыкка 27-октябрда кол койду.
  
  
• Бишкектин базарларынан жалпысынан 108 ID КАРД, 2 айдоочулук күбөлүк жана 2 пенсиялык күбөлүк табылганын Бишкек ШИИББи билдирди. Аталган документтер Мамлекеттик каттоо кызматына өткөрүлүп берилди.
  
  
• Жогорку Кеңештин депутаттары мурдагы президент КУРМАНБЕК БАКИЕВДИН жана 2010-жылдагы Июнь окуясына себепчи болгон КАДЫРЖАН БАТЫРОВДУН мүлктөрүн улутташтыруу боюнча депутаттык комиссия түзүштү. Буга себеп 100дөн ашуун мүлктүн 47си гана улутташтырылганы болгон.
  
  
• Бүткүл дүйнөлүк экономикалык форумдун изилдөөсүнө караганда, ГЕНДЕРДИК ТЕҢДИК боюнча Кыргызстан 81-орунда. Изилдөөгө 144 өлкө катышкан.

Бектур Токтоноев
politika@super.kg