• Президент АЛМАЗБЕК АТАМБАЕВ 5-декабрда эмгек өргүүсүнө чыкты. Кайра качан жумушка чыгары айтылган жок.
  
  
• Баңгизаттарды көзөмөлдөө боюнча мамлекеттик кызматты жоюу тууралуу токтомго өкмөт башчы кол койду. Кызмат укук коргоо органдарын РЕФОРМАЛООНУН максатында жоюлду.
  
  
• Кыргыз мамлекети КМШ жана Европа өлкөлөрүнүн ичинде ЖОЛ КЫРСЫКТАРЫНДАГЫ өлүмдөрдүн саны боюнча 2-орунду ээледи. Биринчи орунда Казакстан турса, үчүнчү орунда Орусия турат.
  
  
• Жогорку Кеңештин депутаты АЙСУЛУУ МАМАШОВА 4-декабрда турмушка чыкты. Эскерте кетсек, Айсулуу Мамашова "Дасмия" комплексинин негиздөөчүсү Турусбек Мамашовдун кызы.
  
  
• Бишкек шаарында быйылкы жылы БАЛАТЫ БАЗАРЫ Ботаникалык бакта иштеп баштады. Баалар 1 миң сомдон 8 миң сомго чейин.
  
  
• Бир ИТТИ АТУУГА 270 сом сарпталат. Бул тууралуу Бишкек мэриясы маалым кылды.
  
  
• Кыргыз мамлекетине келген чет өлкөлүк жарандарды 5 КҮНДҮН ИЧИНДЕ каттоого турууга милдеттендирген токтомду жоюу тууралуу чечимди өкмөт кабыл ала элек.
  
  
• Бишкек шаарынын мэри Албек Ибраимовдун айтымында, 2017-жылдын сентябрь айында МАРШРУТТУК каттамдар токтотулат. Калаага 300дөй автобус алынмакчы.
  
  
• БИШКЕК дүйнөдөгү 420 борбор шаардын ичинен жашоо деңгээли эң төмөн 27 калаанын катарына кирди. Мындай рейтингди "Merser" уюму чыгарган.
  
  
• Кар көчкүдөн улам жабылган БИШКЕК-ОШ УНАА жолу 8-декабрь күнү саат 15:20да бир тарапка ачылды. Бул тууралуу Өзгөчө кырдаалдар министрлиги билдирди.
  
  
• Бишкек шаарынын түштүк-батыш тарабындагы көрүстөндө орун калбагандыктан, шаардан 20 чакырым алыстыктагы Гроздь айылы тараптан жаңы жай бөлүндү. ЖАҢЫ КӨРҮСТӨН 2017-жылы иштей баштайт.
  
  
• Ош шаарында Лексус RX-300 үлгүсүндөгү унаанын Э.К. аттуу айдоочусу мас абалында 57 жаштагы Марипат Эрманбетованы унаасы менен СҮЙРӨП ӨЛТҮРҮП алган. Айдоочу Эрманбетова түшө электе унааны айдап жиберген. Айдоочу кармалып, камакка алынды.
  
  
• Мамлекеттик миграция кызматынын маалымдашынча, өлкөдө 11 ай ичинде 11 751 ЧЕТ ӨЛКӨЛҮК жаранга иштөөгө уруксат берилген. Алардын жарымына чукулу Бишкек шаарында эмгектенишет.
  
• 9-декабрда Бишкектин "Ала-Тоо" аянтында ЖАҢЫ ЖЫЛДЫК БАЛАТЫ орнотулат.

Бектур Токтоноев
politika@super.kg