Борбор калаабыз Бишкек шаарынын мэрлигине эки талапкер гана сунушталды. 4-январда шаардык кеңештеги партиялардын калаа башчылыгына талапкерлерди сунуштоо мөөнөтү аягына чыкты. Буга чейин БШКга учурдагы мэр Албек Ибраимовдун талапкерлиги КСДП, "Республика-Ата Журт" жана "Кыргызстан" фракцияларынан куралган көпчүлүк коалиция тарабынан көрсөтүлгөн болсо, ага жалгыз атаандаш катары оппозициялык "Өнүгүү-Прогресс" фракциясынан Нурдин Абдылдаев сунушталды. Шаар башчылыгына талапкер сунуштоо укугу өкмөт башчыга да берилген, бирок премьер-министр Сооронбай Жээнбеков ал укукту пайдалануудан баш тартты. Ибраимов Бишкекти башкарып келе жатканына 1 жылга чукул убакыт болду. Ал эми Абдылдаев Жогорку Кеңештин экс-депутаты жана Ысык-Көл облусунун мурунку жетекчиси катары белгилүү. Саясий серепчилер "Бишкек шаары кайрадан эле Албек Ибраимовдун башкаруусунда калат" дешет. "Өнүгүү-Прогресстин" лидери Бакыт Төрөбаев болсо "Абдылдаевдин талапкерлигин жөн гана альтернатива катары чыгарган жокпуз" дейт. "Бишкек мэрин шайлоого катышуубуз – бул жөн эле альтернатива эмес. Биз мэрдин кызматы үчүн чындап күрөшөбүз. Депутаттар менен сүйлөшүүлөрдү жүргүзүп жатабыз, эгер жашыруун добуш берүү процедурасы сакталса, анда биздин талапкердин жеңишине бардык мүмкүнчүлүктөр бар",- дейт Төрөбаев.
Эскерте кетсек, Бишкек шаардык кеңешинде 2016-жылдын 11-декабрындагы шайлоодон 5 партия жеңип чыккан. Алар: КСДП, "Республика-Ата Журт", "Кыргызстан", "Өнүгүү-Прогресс" жана "Мекеним Кыргызстан" фракциялары. Шаар мэрин шайлоо 11-январда өтөт. Мэрликке талапкер жеңишке жетиш үчүн 45 депутаттын жарымынан көбүнүн колдоосуна ээ болушу керек.

Бектур Токтоноев
politika@super.kg