2016-2017-окуу жылынын экинчи жарымынан тарта мектептер 5 күндүк тартипте иштей баштады. Өкмөттүн токтомуна ылайык, жумасына 30 сааттан көп сабагы бар класстар 6 күн, ал эми 30га жетпегендер (айрыкча 1-5-класстар) 5 күндөн окушат. Лицей, гимназиялардын окуусу 6 күн бойдон калат. Алынып салынган 6-күн мугалимдердин маянасына зыянын тийгизбейт. "Биз 2012-жылдан баштап этап менен сабактарды кыскартып жатабыз. Балдардын кабыл алуусун эске алып, 5 күндүк тартипке өттүк. Учурда жумасына 30 сааттан ашкан класстар мурункудай эле 6 күндөн окуп жатышат. Быйыл ушундай таризде аяктайбыз. Азыр атайын эксперттик топ иштөөдө. Алар сунуштаган сабактар келерки жылдан баштап кыскартылышы мүмкүн",- дейт Билим берүү жана илим министрлигинин мектепке чейинки, мектепте жана мектептен тышкаркы билим берүү башкармалыгынын жетектөөчү адиси Самаркүл Умралиева.
Бул өзгөрүүлөрдөн улам "кыргыз адабияты сабагы жоюлуп, дүйнөлүк адабият жана кыргыз адабияты аттуу сабакка бириктирилет" деген маалымат коомчулукка тараган болчу. Министрликтин өкүлү Самаркүл Умралиеванын айтымында, кыргыз адабияты кыскарбайт. "Учурда мурункудай эле жумасына 2-3 сааттан кыргыз адабияты предмети окутулуп жатат. Биздеги өзбек, орус адабияты сыяктуу башка элдин адабияттары биригип, дүйнөлүк адабият деген статус алып калышы мүмкүн. Иликтөөлөрдүн жыйынтыгы менен айрым сабактар кыскарып, математика жана кыргыз тили предметтерине кошумча сааттар берилет. Себеби жалпы республикалык тестирлөөнүн жыйынтыгы начар болууда. Ошондуктан аталган эки сабактын саатын көбөйтүүгө мажбур болуудабыз",- дейт министрликтин өкүлү.

Бектур Токтоноев
politika@super.kg