• Мамлекеттик салык кызматынын төрагасы болуп ОКТЯБРЬ АБДЫКАИМОВ дайындалды. Буга чейин ал аталган кызматтын төрагасынын орун басары болуп иштеп турган.
  
  
• 2016-жылы Кыргыз өлкөсүндө 5868 ЖОЛ КЫРСЫГЫ катталган. Бул көрсөткүч 2015-жылга салыштырмалуу 16 пайызга аз. Аталган маалыматты ИИМден билдиришти.
  
  
• Түп районунун Кең-Суу айылында тоого мал айдап кеткен 13 жашар бала КӨЧКҮДӨ калып каза болду. Бул маалыматты ӨКМдан тастыкташты.
  
  
• 2016-жылы жалпы МАМЛЕКЕТТИК КАРЫЗДЫН көлөмү 300 миллион долларга өскөн. Финансы министрлигинин маалыматы боюнча, 2015-жылдын 31-декабрында 3 миллиард 805 миллион доллар болсо, 2016-жылдын 31-декабрында жалпы мамлекеттик карыз 4 миллиард 105 миллион долларга жеткен.
  
  
• ИИМдин жана УКМКнын изилдөөлөрүнүн натыйжасында ЭКСТРЕМИСТТИК маанайда деп табылган 86 веб-сайт жабылды. Аталган маалыматты УКМКдан кабарлашты.
  
  
• Ысык-Көл облусунун Чоң-Сары-Ой айыл өкмөтүндө СПИРТ ИЧИМДИГИН сатууга тыюу салынып, дүкөндөрдөн сатыктагы 26 550 сомдук спирт ичимдиги алынып, жок кылынды.
  
  
• 2016-жылы Кыргыз өлкөсүнө 19 миллион 769 миң 179 таңгак ДАРЫ-ДАРМЕК каражаттары 806 миллион 279 миң 445 сомго алып келинген. Аталган маалыматты Дары-дармек менен камсыздоо жана медициналык техника департаментинен маалымдашты.
  
  
•  Жогорку Кеңештин депутаты АИДА САЛЯНОВАГА козголгон кылмыш ишинде саясий куугунтук бар-жогун иликтөөчү депутаттык комиссия түзүлдү. Аталган демилгеге 105 депутат макул деп добуш берди.
  
  
• Дары-дармек менен камсыздоо жана медициналык техника департаментинин директорлугуна ГҮЛМИРА ШАКИРОВА дайындалды. 2016-жылдын 23-декабрына чейин бул кызматты Рустам Курманов башкарып турган.
  
  
•  Транспорт прокуратурасынын иликтөөсү боюнча, Баткен жана Жалал-Абад АЭРОДРОМДОРУНУН аймагында 20дан ашуун жер тилкеге мыйзамсыз курулуш курулган. Аталган маалыматты 6-февралда Башкы прокуратурадан кабарлашты.
  
  
• 2016-жылы Саламаттыкты сактоо министрлигинин 29 жетекчиси кетирген кемчиликтери үчүн ИШТЕН БОШОТУЛГАН. Министрдин айтымында, бул сан 2015-жылга салыштырмалуу 14кө аз.
  
  
•  9-февраль күнү Бишкектин тургуну таштанды таштоочу жайдан МИНА жана Дегтярёв, Шпагин пулемётторунун ок салуучу кутусун тапкан. Учурда анын кимге таандык болгондугун УКМК иликтеп жатат.
  
  
• "ӨНҮГҮҮ" фонду менен "ЗАМАНДАШ" ассоциациясы эмгек мигранттарынын укуктарын колдоодогу иш-аракеттерди бириктирүү боюнча меморандумга кол коюшту. Аталган биригүү 9-февралда болуп өттү.

Бектур Токтоноев
politika@super.kg