Мурунку премьер-министр Темир Сариев президенттик шайлоого расмий түрдө аттанды. Мындай чечим "Ак шумкар" партиясынын 4-февралда Бишкекте өткөн жыйынында кабыл алынды. Жыйынга республиканын бардык аймагынан келген 200 делегат катышты. Президенттик жарышта кимди колдой тургандыктарын ачыктап экс-депутаттар Курманбек Осмонов, Чолпон Жакупова жана Эсептөө палатасынын мурунку төрайымы Элмира Ибраимова да бул жыйынга катышты. Темир Сариев: "Өкмөт башчы болуп иштеп турганда өлкөнүн потенциалы жогору экенин көрдүм. Кыска убакыттын ичинде секирик жасай алабыз",- деди. Саясатчынын штабынан билдиришкен боюнча, жакынкы күндөрү өлкөнүн бардык аймагында партиянын штабдары ачылып, аймактарда Сариевдин эл менен жолугушуулары уюштурулмакчы.
Эскерте кетсек, президенттик шайлоо ушул жылдын ноябрь айына белгиленүүсү мүмкүн. Маалыматтарга караганда, Жогорку Кеңеш тарабынан шайлоо күнү июнь-июль айларында аныкталат.

Бектур Токтоноев
politika@super.kg