«Супердин» сурак бурчу

Ибрагим Жунусов,
Маданият агенттигинин директору:
– Билбейм, азыр бир нерсе деп айтуу кыйын болуп турат. Өзүм дагы деле бул көрүнүштү толук түшүнүп, кабыл ала элекмин. Ошондуктан учурда болуп жаткан окуяларга, бүгүнкү абалга эч кандай баа бере албайм.

Бек Борбиев,
КРнын Эмгек сиңирген артисти:
– Өнүгүү алып келет деп айтуу кыйын болсо да, бул окуядан соң өлкөдө стабилдүүлүк орноп, паракорлук жоюлат. Жер сатылбай, обу жок кымбаттоолор токтотулат деп күтөбүз. Муну мен гана эмес, жалпы кыргыз эли да каалап жатса керек.

Айбек Карымов,
ырчы:
– Азыр бир жеңден кол, бир жакадан баш чыгарып, биримдикте иштешсе гана өнүгүү болот. Эки кочкордун башы бир казанда кайнабайт да. "Учурдагы лидерлер бир пикирде иштеп кете алышабы?" деген суроого жооп болсо, анда берилген суроого так жооп айта алам.

Асел Турдалиева,
ырчы:
– Ой, азыр эмне деп комментарий бермек элек? Эч кандай айта турган сөзүм жок. Өзүмө келе албай, жаман болуп отурам. Маанайым да жок!

Канат Култаев,
продюсер:
– Акаевдин заманында бир чоң көзү ачыктын “Кыргызстанга үчүнчү президент келет. Ошол башчы өлкөнүн экономикасын өнүктүрүп, чоң-чоң өзгөрүү киргизет" дегенин уккам. Мен ошол кепке ишенем.

Ассоль Молдокматова,
телеалпаруучу:
– Бийликтин алмашканы өлкөгө эч кандай өзгөрүү алып келбейт. Бийлик өкүлдөрүн эмес, андагы системаны өзгөртүү керек. Ошондо гана өсүп-өнүгүү тууралуу ойлонсок болчудай. Бирок мен оптимист адаммын. Жакшылыктан үмүтүмдү үзбөйм.

Гүлнур Сатылганова,
КРнын Эл артисти:
– Мен азыр эч кандай суроого жооп бере албайм. Комментарий берүү оюмда да жок. Шок болуп отурам!