Жогорку Кеңештин "Кыргызстан" фракциясынан депутат Канат Исаевге карата козголгон кылмыш иши боюнча Улуттук коопсуздук мамлекеттик комитети иш алып барат. Башкы прокуратуранын билдиришинче, Исаевге тиешелүү материалдар УКМКга өткөрүлүп берилген. 4-апрель күнү Жогорку Кеңештин комитетинде Башкы прокуратуранын 2016-жылга карата отчёту каралып жатканда башкы прокурор Индира Жолдубаева тергөө кызыкчылыгына туура келбесин айтып, аталган кылмыш иши тууралуу маалымат берүүдөн баш тартты. Башкы прокуратура тарабынан Канат Исаевге карата козголгон кылмыш иши боюнча депутат Алмамбет Шыкмаматов "саясий өңүттө болушу мүмкүн" деп ой билдирди. Буга чейин да айрым саясий серепчилер "Баш мыйзамды өзгөртүүгө каршы чыккандыгы үчүн Исаевге байланыштуу жабылган илгерки кылмыш иши кайра ачылды" деп баа беришкен.
Эскерте кетсек, Канат Исаевге Башкы прокуратура "2008-2010-жылдар аралыгында Токмок шаарынын мэри кызматын аркалап турганда пара алууга жол берген жана кызмат абалынан пайдаланган" деп кылмыш ишин козгоп, 2016-жылдын ноябрында иш кайрадан жанданган.

Бектур Токтоноев
politika@super.kg