11-апрелде Боинг учагы кулаган Дача-СУ аймагынын тургундары Ак үйдүн алдына башка жакка көчүрүү талабы менен кайрадан митингге чыгышты. Анда чогулган 300дөй адам өкмөт башчы жана төрага менен жолугуу талабын коюшту. Бирок бийликтен эч кандай реакция болбой, кийин гана учак кырсыгынан жабыркагандардын талабы боюнча маалымат таратылды. Өкмөт тараткан маалыматта учак кулаган аймактын тургундарын көчүрүүгө жер жок экендиги айтылды. "Азыркы учурда кырсыктан каза болгондордун жакындарына жана жабыркагандарга компенсация төлөп берүү боюнча түрк тарап менен сүйлөшүүлөр жыйынтыктоочу этапта",- деп жазылат өкмөттүн билдирүүсүндө. Аталган аймактын жашоочулары мындай талап менен март айында да 2 митинг өткөрүшкөн. Өкмөттүк комиссия материалдык зыяндын көлөмүн
195 миллион сом деп чыгарганы белгилүү. Түрк авиакомпаниясынан Өзгөчө кырдаалдар министрлиги ачкан бирдиктүү эсепке азырынча 600 миң доллар (41 миллион сомдун тегереги) которулган. Ал эми элден жардам катары чогултулган акча каражаты 31-мартка карата 100 миллион сомдон ашкан.
Ушул жылдын 16-январында "Манас" аба майданынын жанындагы Дача-СУ аймагына жүк ташуучу учак кулап, 35 кыргыз жараны көз жумган.

Бектур Токтоноев
politika@super.kg