Президенттик аппараттын жетекчиси Сапар Исаков 6-апрелде эл аралык каржы уюмдарынын өкүлдөрү менен болгон жолугушууда "Таза коом" ("Smart country") долбоору менен тааныштырды. Аталган көп жылдык долбоордун негизги максаты – жарандарга кызмат көрсөтүүнү жакшыртуу жана ишкерликке ыңгайлуу шарт түзүү. "Таза коом" долбоору өлкөнүн 2040-жылга чейин Улуттук стратегиясынын бир бутагы болуп саналат. Исаков каржы уюмдарынан каражат жактан жана методикалык тараптан колдоо көрсөтүүнү суранды. Анын айтымында, жакынкы айларда Кыргыз мамлекетинде аталган долбоорду колдоо боюнча донорлук конференция уюштурулат. Алдын ала эсептер боюнча, "Таза коом" долбоорун ишке ашыруу үчүн 150 миллион доллар керектелет. "Биз Улуу Британия, Эстония же Израилдин деңгээлине жетүүнү көздөп жатабыз",- дейт президенттик аппараттын жетекчиси. 10-апрелде Эстония аталган долбоорду ишке ашырууга жардам берерин билдирген.

Бектур Токтоноев
politika@super.kg