2-майдан тарта биометрикалык паспорт бериле баштады. Мамлекеттик каттоо кызматынын маалыматына караганда, бул жаңы документ 2017-жылдын аягына чейин бекер берилет. Биометрикалык паспорт ала электер алдыдагы шайлоолорго ID картасы менен катыша алат. "2-май күнү эле Бишкек шаарындагы калкты тейлөө борборлоруна 1498 жаран, ал эми өлкө боюнча 4556 жаран анкета толтурду. Мындан улам кызматкерлерибиз убактылуу 19:00гө чейин калкты тейлейт",- деп айтылат мекеменин тараткан маалыматында.
Аталган электрондук паспортто ээси тууралуу 19 маалымат камтылган. Биометрикалык паспортто "улуту" деген графаны алып салуу демилгеси коомчулукта кызуу талкууга алынган болчу. Жаңы паспортко кошумча берилчү атайын чипке 19 маалыматтын ичинде улуту тууралуу маалымат да киргизилет. Бирок ал графаны каалоочулар гана толтурат. Жарандар документтерди тапшыргандан баштап 2 апта ичинде жаңы паспортко ээ болушат. Өлкө жаранынын паспорту 1994-2004-жылдардагыдай китепче же ID карта үлгүсүндө болсо, анда ал адамдан кошумча эч кандай документ талап кылынбайт. Ошол эски үлгүдөгү паспорттор биометрикалык паспорт алууга жетиштүү.
Айрым паспорт тармагындагы эксперттер Кыргыз өлкөсүнүн биометрикалык паспортко өткөнүн шашылыш, жакшы ойлонулбаган кадам катары баалашууда. Себеби мамлекетте калкты тейлөө электрондоштурулган эмес. Андыктан жаңы паспорттун өзгөчөлүктөрүн толук пайдалана албайбыз.
Маалымат үчүн: Биометрикалык паспорттор "Таза коом" долбоорун ишке ашыруу, тагыраагы, өлкөнү санариптик системге өткөрүү жана электрондук өкмөттү түзүү үчүн базалык шарттардын бири болуп саналат.