Экс-президент Курманбек Бакиевдин уулу Максим Бакиев Англиянын Жогорку Сотунда Кыргыз өкмөтүнүн үстүнөн жазган доо арызынын негизинде жеңип алды. Аталган маалыматты Максим Бакиевдин адвокаты жалпыга маалымдоо каражаттарына тараткан. Жогорку Кеңештин депутаты Эльвира Сурабалдиева социалдык тармактагы баракчасына өкмөт 2016-жылы Максим Бакиевдин экономикалык кылмыш жасаганын сотто далилдей албаганын айтып: "Мен 2016-жылы апрелде доо арызды берүү мөөнөтү тууралуу маселени көтөрүп чыкканымда "маалымат туура эмес" деп мени айыпташкан болчу. Эми мына ошол адамдар коомго мамлекеттин бюджети канча сумманы эсепке албай койсо болорун айтышсын. Экс-президенттин уулунун коррупция жана экономикалык кылмыштарга байланыштуу далилдерди бере албаган ведомство өз өлкөсүнүн кызыкчылыктарына карата ушундай шалаакы мамилеси үчүн кандайдыр бир жоопкерчилик алышы керек",- деп жазып чыкты.
Эске салсак, Кыргыз өкмөтү Максим Бакиевдин үстүнөн жазган доо арызын 2016-жылдын октябрь айында кайтарып алганы кабарланган. Өкмөт бул иш кайрадан жанданарын убадалап, "Бакиев сотто жеңди" деп айтыш туура эместигин эскерткен. Маалыматка караганда, сот өкмөттү Максим Бакиевге кетирген чыгымдарын төлөп берүүгө милдеттендирген. Сот процессинде Максим Бакиевдин кызыкчылыгын "Хикман энд Роуз" юридикалык компаниясы коргоодо.
Өкмөттөн окуя тууралуу "маалымат бизге бейрасмий түрдө келди, расмий маалымат такталууда" деген жооп беришти.

Бектур Токтоноев
politika@super.kg