• Ош облусунун Чоң-Алай районунда болгон бир нече жер титирөөдөн кийин 610 турак жай АВАРИЯЛЫК АБАЛДА деп табылды. Аталган маалыматты ӨКМ таратты.
  
  
• Жыл башынан бери КЫРГЫЗ ӨЛКӨСҮНӨ 116 адам баш калка издеп келген. Аталган маалыматты Мамлекеттик миграция кызматынан кабарлашты.
  
  
• Ош облусундагы ТАБИГЫЙ КЫРСЫКТАРДАН жабыркагандар үчүн ачылган ӨКМнын атайын эсебине 13,6 миллион сом чогулду. Бул тууралуу ӨКМ 31-май күнү билдирди.
  
  
• Мурунку билим берүү жана илим министри КАНАТ САДЫКОВ Жусуп Баласагын атындагы Кыргыз улуттук университетинин ректору болуп шайланды.
  
  
• 2017-жылдын 5 айынын жыйынтыгы боюнча Кыргыз өлкөсүнөн 114 адам ДЕПОРТАЦИЯЛАНГАН. Бул тууралуу Мамлекеттик чек ара кызматынан кабарлашты.
  
  
• 2017-жылдагы ПРЕЗИДЕНТТИК ШАЙЛОО 15-октябрда өтөт. Бул мыйзамды Жогорку Кеңештин депутаттарынын 106сы колдоп, 3-окууда жактырышты.
  
  
• Кыргыз өлкөсүндөгү ар бир төртүнчү бойго жеткен жаран ЧЫЛЫМ чегет. Жыл сайын 6 миңдей адам тамекиге байланыштуу оорулардан улам көз жумат. Бул боюнча Саламаттыкты сактоо министрлигинен кабарлашты.
  
  
• Орусия жана Казакстан Кыргыз Республикасынын жарандарынын жаңы БИОМЕТРИКАЛЫК ПАСПОРТТОРУН тааныды. Мындан улам жаңы үлгүдөгү паспорттор менен аталган мамлекеттерге тоскоолдуксуз кирип-чыкса болорун Тышкы иштер министрлиги билдирди.
  
  
• Орусиянын Челябинск облустук соту 30-май күнү кримтөбөл АЗИЗ БАТУКАЕВДИН эжеси Яха Батукаева боюнча өкүм чыгарып, 17 жылга кести. Анын 28 килограмм героинди сактап жүргөндүгү сотто аныкталган.
  
  
• Башкы прокуратура "АЗАТТЫККА" карата сотко жазган доо-арызын кайтарып алды. Аталган маселени карап чыгууну 12-майда президент Алмазбек Атамбаев Башкы прокуратурага сунуштаган. "Азаттыкка" 20 миллион сом доо коюлуп, банк эсеби камакка алынган болчу.
  
  
• Мамлекеттик кызматкерлер 2018-жылдын 1-январынан тарта МАМЛЕКЕТТИК ТИЛДЕН сынак тапшырып калуулары мүмкүн. Аталган мыйзам долбоору учурда коомдук талкууга коюлду.
  
  
• 2017-жылдын 1-июнунан тарта Орусиядагы МИГРАНТТАР үчүн чет өлкөлүк айдоочулук күбөлүктөр менен эл, жүк ташып иштөөгө тыюу салынат.
  
  
• Кыргыз өлкөсүндөгү АЙДООЧУЛАР өзү менен кошо алкотестерди алып жүрүүсү парламентте демилге болуп көтөрүлдү.
  
  
• Лондондун экономика жана тынчтык институтунун чыгарган "БЕЙПИЛДИКТИ СҮЙГӨН ӨЛКӨ" рейтингинде Кыргыз өлкөсү 111-орунга жетип, АКШ менен Кытайды артта калтырды.
  
  
• 31-май күнү Ош-Исфана жолунда Патрулдук милициянын кызматкери 12 жашар КЫЗДЫ СҮЗҮП кетти. Жабыркаган Н.М. аттуу кыздын буту сынгандыгы анык болду.

Бектур Токтоноев
politika@super.kg