Өмүрбек Бабанов өткөн жумада өз кичи мекени Таласка барып, «Республика–Ата Журт» фракциясынын көчмө жыйынын өткөрдү. Жыйынга бир топ министрлердин орун басарлары катышып, чогулган элдин суроолоруна жооп беришти. Бабанов козголгон маселелер боюнча министрлик өкүлдөрүнө тапшырма берип, бир топ маселе ошол эле жерде чечилди. Келген эл негизинен келе жаткан президенттик шайлоо тууралуу кеп кылышып, Өмүрбек Токтогуловичке ийгилик тилешип, ак баталарын беришти. Ушундай эле фракциянын көчмө жыйындары буга чейин Ысык-Көл, Чүй, Баткен, Жалал-Абад облустарында болуп өткөн. Буга чейинки облустардагы жолугушууларда губернаторлор катышып келсе, бул саам Таластын губернатору Даир Кенекеев келген жок. Фракция лидери баш болуп, өкмөт өкүлдөрү биргеликте Талас көйгөйлөрүн чечели деп келген жыйынга Кенекеевдин келбей коюшун калың эл «бизге кайдыгер көз карашта экен» деп түшүнүп калды.