• Өлкөдө министрликтердин иш кагаздарынын 15-20 пайызы гана МАМЛЕКЕТТИК ТИЛДЕ жүргүзүлөт. Бул тууралуу Улуттук тил комиссиясынын төрагасы Назаркул Ишекеев билдирди.
• Кыргыз мамлекетиндеги 1805 айылдын 657синде ТАЗА СУУ жетишпейт. Аталган маселе 2023-жылга чейин 100 пайыз чечилүүсү пландалганын өкмөттөн маалымдашты.
• БШК ПРЕЗИДЕНТТИК ШАЙЛООГО байкоо жүргүзүүчү 38 мамлекеттен 203 адамды каттады. Эл аралык байкоочуларды каттоо 10-октябрда токтойт.
• Республика аймагында 23-26-сентябрь күндөрү абанын температурасы кескин төмөндөп, тоолуу аймактарда ҮШҮК ЖҮРҮШҮ мүмкүн. Кыргызгидрометтин маалыматына караганда, мезгил-мезгили менен жамгыр жаап, Чүй, Талас облустарында түндөсү аба температурасы +3 градуска чейин төмөндөйт.
• 2017-жылдын май-август айларында өлкө боюнча 203 миң 749 адам БИОМЕТРИКАЛЫК ПАСПОРТКО ээ болгон. Бул көрсөткүч былтыркы жылга салыштырмалуу 63 миңге көп. Маалыматты Мамлекеттик каттоо кызматынан таратышты.
• «Кызмат абалынан кыянаттык менен пайдаланган» деп айыпталып жаткан парламент депутаты АИДА САЛЯНОВАНЫ прокурорлор 8 жылга эркинен ажыратууну Бишкектин Ленин райондук сотунан сурады.
• «Inter-Parliamentary Union (IPU)» союзу чыгарган рейтингде парламенттеги АЯЛ ДЕПУТАТТАРДЫН саны боюнча Кыргыз өлкөсү 100-орунга татыган. Ал эми Казакстан 57-орунду ээлесе, Орусия 127-орунда.
• КМШ өлкөлөрүнөн «ТУРИСТТЕР үчүн эң таанымаал шаар» рейтингинде Бишкек 10-орунга татыды. 1-орунду Беларустун борбору Минск шаары ээлеген. Рейтингди «ТурСтат» аналитикалык агенттиги түзгөн.
• 2017-жылдын биринчи жарым жылдыгында БАҢГИЗАТТАРГА көз каранды болгондордун саны 16,1 пайызга азайган.
• Мамлекет боюнча 597 бала ВИЧ инфекциясына чалдыккан. Маалыматты Республикалык СПИД борборунан таратышты.
• Кыргыз өлкөсүндө каза болгондордун 51,5 пайызы ЖҮРӨК-КАН ТАМЫР ооруларынан жабыркагандар. Бул тууралуу саламаттыкты сактоо министри Талантбек Батыралиев билдирди.
• КЫРГЫЗ-ӨЗБЕК чек арасындагы "Баймак" көзөмөл-өткөрүү бекети 19-сентябрдан тарта эки тараптуу ачылды.

Бектур Токтоноев
politika@super.kg