Акыркы күндөрү интернеттеги социалдык тармактарда, айрым басылмаларда «БШК мүчөлөрүн сатып алуу аракети болгонбу?» деген мааниде маалыматтар айтылып, жазылып, талкууга алынууда. Мындай талкууларды «БШКнын мүчөсү болгон Назарали Арипов Өмүрбек Бабановдун үй-бүлөсүнө тиешелүү «Кыргызстан» коммерциялык банкынан 19-октябрда 19 920 доллар өлчөмүндө кредит алыптыр» деген маалымат ого бетер күчөттү. Бул маалыматты талкууга алгандардын арасында «Бабановдун банкынан БШКнын башка мүчөлөрү да кредит алган эмеспи? УКМК менен Башкы прокуратура муну иликтейби?» деп суроо салгандар да бар.
Назарали Арипов бул боюнча «Супер-Инфого»: «Мындай маалыматтарды таратуу акмакчылык деп эсептейм. Паракорлорду башка жактан издешсинчи. Өтө төмөн деңгээл бул. Издей беришсин дагы. Кредит боюнча айтсам, мен банктар менен иштешем, бирок азыр эч кандай кредитим жок»,- деп билдирди.

Адилет Керимбек уулу
politika@super.kg