Дүйнөлүк банктын "Европа жана Борбордук Азиядагы миграция жана мобилдүүлүк" аталышындагы докладынын билдирүүсү боюнча, Кыргыз мамлекети акча которуулар боюнча алдыңкы орунда турат. Ага ылайык, Кыргыз Республикасына чет өлкөдөн которулган акчалардын көлөмү Ички дүң продукциясынын 37 пайызын түзөт. Бул көрсөткүч Европа жана Борбор Азия боюнча 1-орунда болсо, экинчиде 28 пайыз көрсөткүчү менен Тажикстан ээлеген. “Миграциянын өнүгүүсү Европа жана Борбордук Азия өлкөлөрүнүн макроэкономикалык туруктуулугун жана атаандаштыкка туруштук берүү мүмкүнчүлүгүн азайтат. Акча которуулар товарды пайдаланууга жакшы таасирин берет, өтүмдүүлүгү жогору товарлардын баасынын өсүшү тышкы соодага кетчү товарлардын баасынын көтөрүлүшүнө алып келерин айтышат”,- деп айтылат докладда. Ошондой эле Дүйнөлүк банктын адистери кыргыз бийлигин жергиликтүү өндүрүштөрдү ЕАЭБдин стандартына дал келтирүү иштерин илгерилетиши керектигин билдиришти.
Улуттук банктын маалыматы боюнча, 2017-жылдын алгачкы алты айында чет жакта иштеген мигранттардан Кыргыз өлкөсүнө которулган акчалардын суммасы 1 миллиард 300 миллион долларды түзгөн.

Адилет Керимбек уулу
politika@super.kg