Кыргыз Республикасынын Түштүк Кореядагы атайын жана ыйгарым укуктуу элчиси Кылычбек Султан 1-декабрда Сеул шаарында аталган өлкөнүн тышкы иштер министринин орун басары Ли Вук Хёнго Ишеним грамотасынын көчүрмөсүн тапшырды. Бул тууралуу Кыргыз өлкөсүнүн Түштүк Кореядагы элчилигинен маалымдашты.
Маалыматка караганда, жолугушууда эки тарап кызматташууну мындан ары да өркүндөтүү жолдорун талкуулашкан. Баарлашуунун жүрүшүндө Ли Вук Хён Кылычбек Султанды атайын жана ыйгарым укуктуу элчилик кызматына киришкени менен куттуктап, ийгиликтерди каалады.
Эске салсак, Кылычбек Султан ушул жылдын 28-октябрында ошол кездеги президент Алмазбек Атамбаевдин жарлыгынын негизинде Кыргыздын Түштүк Кореядагы элчиси болуп дайындалган. Кылычбек Султан 2012-2013-жылдары социалдык өнүгүү министри, 2014-2016-жылдары Кыргыз Республикасынын Малайзиядагы элчиси, 2016-2017-жылдары Өзгөчө тапшырмалар боюнча элчи-тышкы иштер министринин кеңешчиси болуп иштеп келген.

Бектур Токтоноев
politika@super.kg