Премьер-министр Сапар Исаков 30-декабрда Чүйдүн Аламүдүн районунда жайгашкан «Чуңкурчак» тоо лыжа базасында кышкы туристтик сезондун ачылышына катышты. Быйыл калың кар декабрдын аягында жааганына байланыштуу 2017-2018-жылкы кышкы туристтик сезон кечирээк башталды. Өкмөт башчы Сапар Исаковдун айтымында, кышкы туризм үчүн өлкөгө келген туристтердин саны жылдан-жылга өсүүдө. «Быйылкы лыжа тебүү мезгили мыкты болот деп ойлойм. Эс алуучулар үчүн жакшы шарттарды түзгөнгө аракет кылабыз»,- деди Исаков. Өкмөт башчы Кыргыз өлкөсү кышкы туризм боюнча ири потенциалга ээ экенин айтып, бул багытта алгылыктуу иштер жасалышы керектигин кошумчалады.
Айта кетсек, өлкөдө азыркы тапта 20дан ашуун тоо лыжа базасы иштейт. Бирок басымдуу бөлүгү керектүү шарттар менен камсыздалган эмес.