Ички иштер министрлиги оң рулдуу автоунааларда жүргүнчү ташып иштөөгө 2018-жылдын 1-январынан тарта тыюу салууну караган мыйзамды артка кайтарып алды. Аталган мыйзам долбоорун кайра иштеп чыгуу жоопкерчилиги Транспорт жана жолдор министрлигине берилди. Буга чейин ИИМ «оң рулдуу автоунаалар катышкан жол кырсыктары көп болуп жатат» деп, 2018-жылдан тарта андай унааларды такси кызматына пайдаланууга тыюу салууну сунуштаган. Бирок бул аракет рулу оң тарабында жайгашкан унааларда жүргүнчү ташып үй-бүлөсүн багып жаткан жарандардын нааразычылыгын жараткан эле. Эксперттер жол кырсыктарын мындай тыюу менен азайтуу мүмкүн эместигин, маселе жалпы комплекстүү иш-чаралардын негизинде гана чечилерин айтып келишет.