Кайсы аймактан чиновник же депутат көп болсо, грант, насыя жана бюджеттик каражаттар ошол жакка агып кетпеши керек. Бул тууралуу президент Сооронбай Жээнбеков 23-январда аймактарды өнүктүрүү боюнча түзүлгөн жумушчу топтун алгачкы жыйынында айтты.
«Өлкөнү өнүктүрүү үчүн биринчи аймактарды өнүктүрүү керек. Аймактардын өнүгүшүндөгү тең салмактуулуктун жоктугу көп жылдардан бери жоюлбай жатат. Айрым аймактар өнүгүп, башкаларга көңүл бурулбай калууда. Каражат бар. Узак мөөнөттүү акчалар бар. Ошону беребиз. Бирок каалаганыңарга, жакыныңарга бере бербестен каражат керек болгон аймакка биздин уруксат менен гана бересиңер»,- деди өлкө башчы.
Жогорку Кеңештин расмий сайтындагы маалыматка таянсак, парламенттин 6-чакырылышында Ош облусунан 34, Чүйдөн 32, Жалал-Абаддан 17, Нарындан 11 жана Таластан 8 депутат бар. Ысык-Көл жана Баткен облустарынан 6дан эл өкүлү шайланган. Ал эми 3 депутат чет өлкөдө төрөлгөн. Азыркы тапта өкмөт мүчөсү болуп иштеп жаткандардын басымдуу бөлүгү Бишкек шаарында туулган.

Бектур Токтоноев
politika@super.kg