Жогорку Кеңеште КСДП фракциясынан депутат Рыскелди Момбеков Кыргыз сотторуна эл ишенбей калганын айтып чыкты. Депутат бул пикирди парламентте Сотторду тандоо кеңешине талапкерлер каралып жатканда билдирди. "Кезинде Аскар Акаев "сотторго 80 пайыз эл ишенбейт экен" деп чок тебелеген тооктой чочуган. Азыр сотторго карапайым калктын 90 пайызы ишенбейт десем аша чапкандык болбойт. Бизге түшкөн кайрылуулардын 90 пайызы соттун чечимдерине болгон нааразычылыктар. Карап көргүлө, 10 миллион жеген аткаминерге 1,5 миллион айып салынып, эч нерсе жебеген Алмамбет Шыкмаматовго 5 миллион айып салынып жатса, каяктагы адилеттүүлүктү айтабыз?»,- деди эл өкүлү.
Айта кетсек, «Ата Мекен» фракциясынан депутат Алмамбет Шыкмаматовго Башкы прокуратура 2017-жылдын февраль айында «коррупция» беренеси боюнча кылмыш ишин козгогон. Ал «2011-жылы Эсептөө палатасында аудитор болуп иштеп турганда кызматтык унааларды сатып алуу боюнча тендерде мыйзам бузуп, мамлекетке 3000 доллардын тегерегинде зыян келтирилген» деп айыпталган. Бишкектин Биринчи Май райондук соту Алмамбет Шыкмаматовду күнөөлүү деп таап, 5 миллион сом айып салган. Учурда аталган иш Бишкек шаардык сотунда каралууда.

Бектур Токтоноев
politika@super.kg