• Москва шаарындагы «Печатный экспресс» басмаканасынын директору Сергей Москвин шарттуу түрдө абактан бошотулду. 2016-жылы аталган басмаканада өрт чыгып, ошол жерде иштеп жаткан Кыргыздын 14 КЫЗ-КЕЛИНИ КӨЗ ЖУМГАН.
• Баткендин Кадамжай районунан өлкөдө ЭКСТРЕМИСТТИК уюм деп таанылган «Йакын-Инкар» уюмунун 13 мүчөсү кармалып, убактылуу кармоочу жайга киргизилди. Буга байланыштуу кылмыш иши козголду.
• 2018-жылкы АЖЫЛЫК САПАРГА жалпысынан бир адам үчүн 2890 доллар керектелет. Бул тууралуу муфтияттан билдиришти.
• Бишкек шаардык кеңеши ШАБДАН БААТЫР көчөсүн 7-АПРЕЛЬ деп атоо чечимин кабыл алды.
• Бишкек шаарына ЖЫЛУУЛУК БЕРҮҮ 22-мартта токтотулду. Былтыр суук аба ырайына байланыштуу жылуулук берүү 10-апрелге чейин созулган.
• Учурда Таластагы КИРОВ суу сактагычындагы суунун көлөмү 320 миллион метр кубга жетти. Бул былтыркыга салыштырмалуу 180 миллион метр кубга аз.
• III Бүткүл дүйнөлүк КӨЧМӨНДӨР ОЮНУ Ысык-Көлдө ушул жылдын 2-8-сентябрь күндөрү өтөт.
• Январь айында МИГРАНТТАР Кыргыз өлкөсүнө 145,9 миллион доллар которушту. Бул көрсөткүч 2017-жылдын ушул айына салыштырмалуу 24,5 миллион долларга көп. Маалыматты Улуттук банктан тастыкташты.
• 2017-жылы Кыргыз өлкөсүнүн мамлекеттик чек арасынан КҮЙҮҮЧҮ МАЙДЫ мыйзамсыз жол менен алып өтүүгө аракет жасаган 148 факт катталды.
• Быйыл 7-АПРЕЛЬ – Элдик Апрель революциясынын күнү ишембиге туш келгендиктен, 9-апрель дем алыш күн деп жарыяланды.
• Өлкөдө 1-апрелден тарта 7 жаштагы 7 миң БАЛАНЫН ДЕН СООЛУГУ атайын долбоордун негизинде текшерүүгө алынат.
• Нооруз майрамынан кийин Бишкектин борбордук аянтынан 11 ТОННА ТАШТАНДЫ чыгарылды.
• ДҮЙНӨЛҮК БАНК Кыргыз өлкөсүнө интернетти жана электрондук тейлөөнү жакшыртуу үчүн 25 миллион долларды гранттык негизде, 25 миллион долларды насыя түрүндө берди.
• «АЛЬФА ТЕЛЕКОМ» (МЕГАКОМ) компаниясын сатып алууга швейцариялык "MFT Services SA" компаниясы кызыгууда. Ушуну менен сатып алууга ниеттенген компаниялардын саны 4кө жетти.

Бектур Токтоноев
politika@super.kg