Жогорку Кеңеш айдоо жерлерине курулуп калган турак жайларды мыйзамдаштыруу жөнүндө мыйзам кабыл алды. Ага ылайык, өлкөдө 2009-жылдын 31-июлуна чейин үй курулуп калган сугат жерлерди трансформациялоого уруксат берилет. Маалыматка ылайык, 1983-жылдан 2009-жылга чейин Кыргыз мамлекетинин 218 айыл аймагынын 13 478 гектар айдоо аянты турак жай курууга берилип кеткен. Алардын 11 784 гектары сугат жери. Бул жерлерде учурда 42 миңден ашык үй-бүлө турак жай куруп, жашап жатышат.

Депутат Айтмамат Назаров мыйзамды даярдоодо Аламүдүн жана Сокулук райондорундагы жер тилкелери боюнча талаш-тартыш жаралганын айтты. Талаштуу аймактардагы жерлерди трансформациялоо боюнча өкмөт күзүндө өзүнчө мыйзам долбоорун сунуштаганы жатат.

Айта кетсек, 2009-жылга чейин сугат жерлерине курулуп калган үйлөрдү мыйзамдаштырып берүү жөнүндө мыйзамды парламент 2017-жылы жайкы каникулга кетерде кабыл алган. Бирок ал кездеги президент Алмазбек Атамбаев мыйзамга кол коюудан баш тартып, толуктап иштеп чыгуу үчүн артка кайтарган. Парламентте макулдашуу тобу түзүлүп, документ кайрадан иштелип чыкты. Биринчи вице-премьер-министр Кубатбек Боронов мыйзам кабыл алынары менен эле жарандарга турак жайларын мыйзамдаштыруу укугу берилбей турганын, трансформация боло турган жер тилкелерин өкмөт дыкат аныктап чыгарын, кылмыш иштери бар жана соттук териштирүүлөр жүрүп жаткан жер тилкелери трансформация боло турган жерлердин тизмесине кирбей турганын билдирди. Мыйзам президенттин кол коюусуна жиберилет.

Автандил Добулбеков
politika@super.kg