11 жарым жылга соттолгон экс-депутат Садыр Жапаровдун адвокаттары ишти жаңы ачылган жагдайларга байланыштуу кайра кароону суранып Башкы прокуратурага кайрылды. Адвокат Шарабидин Токтосунов кылмыш ишинде жабырлануучу катары каралган экс-чиновник Эмилбек Каптагаевдин “Жапаровго эч кандай доом жок, ал кылмыш кылган эмес” деген көрсөтмөсү сотто эске алынбаган дейт. “Жаңы бийлик эски бийликтин катасын кайталабайт, Жапаровдун ишин кайра кароого жөнөтөт” деп үмүттөнүп жатышканын айтат адвокат. Ушундай үмүт “Ата Мекендин” өкүлдөрүндө да бар эле. Быйыл май айында Өмүрбек Текебаевдин адвокаттары да Текебаевдин ишин жаңы ачылган жагдайларга байланыштуу кайра кароону суранып Башкы прокуратурага кайрылып, бирок көзөмөлчү орган “кайра кароого негиз жок” деп ишти кароодон баш тарткан. Прокуратуранын бул чечимин жокко чыгаруу өтүнүчү менен Текебаевдин адвокаттары сотко кайрылышкан. Бишкектин Октябрь райондук соту Башкы прокуратуранын чечими боюнча түшкөн арызды кароодон баш тарткан.

Автандил Добулбеков
politika@super.kg