Парламентте өкмөт өкүлдөрүнө сын күчөдү. Жакында өкмөт башчы Мухаммедкалый Абылгазиев “ишиндеги кемчиликтери үчүн” деп каржы министри Адылбек Касымалиевге сөгүш жарыялаган. Ушул аптада депутаттар “экономикада жылыш жок” деп экономика министри Олег Панкратовду кызматтан алуу тууралуу өкмөткө сунуш айтышты. Жогорку Кеңеште айыл чарба, тамак-аш өнөр жайы жана мелиорация министри Нурбек Мурашевдин ишине нааразылар да көбөйдү. Расмий маалыматка ылайык, акыркы 8 айда экспортко караганда импорт өсүп, ички дүң продукциянын көлөмү 0,3 пайызга азайган.

Жакында президент Сооронбай Жээнбеков министр Мурашевди кабыл алып, картошканын баасынын түшүп кетишин талкуулады. Коомчулукта "картошканын баасы президент талкуулай турган маселе эмес, аны өкмөт башчы эле чече турган иш" деген сөздөр айтылды. Мурашевди өкмөт жыйынында премьер Абылгазиев да күнөөлөдү. “Биз өзүбүздүн ички рыноктун керектөөсүн толук камсыздай албай жатабыз, чет өлкөгө продукция экспорттоону айтпай эле коёлу”,- деди өкмөт башчы. Ошентип, парламент өзү шайлаган өкмөттү, Абылгазиев өзү сунуштаган команданы эффективдүү иштете албай жатат.

Автандил Добулбеков
politika@super.kg