• Расмий маалыматка таянсак, учурда Кытайда 17 КЫРГЫЗ ЖАРАНЫ абакта отурат.
• 1-ноябрдан тарта Ош шаарындагы көп кабаттуу үйлөргө ЖЫЛУУЛУК БЕРИЛЕ БАШТАДЫ.
• Жогорку Сот экс-мэр КУБАНЫЧБЕК КУЛМАТОВду 24-ноябрга чейин камакта кармоо боюнча мурунку сот чечимдерин күчүндө калтырды.
• Камбар-Ата-2 ГЭСинин иштөөсү УБАКТЫЛУУ ТОКТОТУЛДУ. “Электр станциялары” ишканасы муну “гидроагрегат баткакка толуп калды, ал ноябрь ичи тазаланат” деп түшүндүрдү.
• Чүй облусунда рейд жүргүзүлүп, бир аптада мас болуп унаа айдаган 38 АЙДООЧУ жоопко тартылганы маалымдалды.
• Кетирген кемчиликтери үчүн каржы министри Адылбек Касымалиевге СӨГҮШ ЖАРЫЯЛАНДЫ.
• МИРА КАРЫБАЕВА Президенттик аппараттын жарандык өнүктүрүү, диний жана этностук саясат бөлүмүнүн башчысы кызматынан бошотулду.
• КСДПнын КЕЗЕКТЕГИ КУРУЛТАЙЫ 2019-жылдын 6-апрелине белгиленгенин партиянын катчылыгы маалымдады.
• Өлкөдө 9 айда жол кырсыгынан 458 АДАМ КАЗА БОЛУП, 6299 адам жаракат алганын Башкы прокуратуранын өкүлү билдирди.
• Социалдык фонд: Өлкөдө пенсиянын эң төмөнкү СУММАСЫ 1000 СОМ, эң жогорку суммасы 100 миң сом.
• Депутат Кенжебек Бокоев Кыргыз мамлекеттик айыл чарба институтуна ЧЫҢГЫЗ АЙТМАТОВдун ЫСЫМЫН берүүнү сунуштады.
• Парламент депутаттары ички каттамдар үчүн авиабилеттин баасы 4 МИҢ СОМДОН АШКАНЫН айтып Жарандык авиация агенттигин сындашты.
• Расмий маалыматка таянсак, учурда өлкөдө 1390 БАЛА БАКЧА бар. Анын 248и гана мамлекеттик, калганы менчик.
• 1-ноябрда өлкөдө Кыргыз милициясынын 94 ЖЫЛДЫГЫ белгиленди.
• Акылбек Жамангуловдун ордуна НУРБЕК ТОТОНОВ "Республика-Ата Журт" фракциясынан парламент депутаты болуп бекитилди. Жамангулов өткөн аптада “Мегаком” компаниясынын директору болуп дайындалган.
  

Автандил Добулбеков
politika@super.kg