Парламенттеги “Ата Мекен” фракциясынын лидери Алмамбет Шыкмаматовго каршы козголгон кылмыш иши кыскартылды. Депутат өзү “коюлган айып далилденген жок, мага каршы ачылган кылмыш ишинде кылмыштын курамы жок экени аныкталды” деп билдирди.

Алмамбет Шыкмаматов 2017-жылы “Эсептөө палатасынын аудитору кезинде жеке кызыкчылыгын көздөп, аялынын унаасын кымбат баага сатуу үчүн “Барат Люкс” ишканасын тендерге катыштырган, Эсептөө палатасына аялынын унаасын базар баасынан кымбат сатууну уюштурган” деп айыпталган. Ушул эле жылы Биринчи Май райондук соту күнөөлүү деп таап, Шыкмаматовго 5 миллион сом айып салган. Аны менен бирге айыпталган Эсептөө палатасынын мурдагы аудитору Жусуп Иманалиев 10 жылга эркинен ажыратылган. Бул чечимге макул болбогон Шыкмаматов шаардык сотко арызданып, Бишкек шаардык соту быйыл июнда райондук соттун чечимин жокко чыгарып, ишти кайра тергөөгө жиберген. Муну менен Шыкмаматов депутаттык мандатын сактап калган. Бул кылмыш иши коомчулукта Өмүрбек Текебаев, Дүйшөнкул Чотонов, Садыр Жапаровдун кылмыш иши сыяктуу эле саясий негиздеги иш деп аталып келди. Ал эми Шыкмаматов менен бирге айыпталган Жусуп Иманалиев буга чейин башка кылмыш ишине да айыпталып, 10 жылга эркинен ажыратылган. Учурда ошол иш боюнча абакта отурат.

Автандил Добулбеков
politika@super.kg