23-январда борбор шаарыбыздагы “Манас” кинотеатрында режиссёр Сүйүн Откеевдин “Жетикс” тасмасынын “жашыруун”, тагыраагы, жабык бет ачары болуп өттү. Кыргыз адабиятында алгачкы фантастикалык чыгарма катары Кусейин Эсенкожоевдин “Үчүнчү шарын” билсек, кыргыз тасмаларынын ичинен "Жетикс" балдарга арналган алгачкы фантастикалык тасма болду. Кыргыз тасмаларынын корифейи болгон Болот Шамшиев да тасмада роль жаратты. “Мен балдарга арнап тасма тартуу үчүн жашым өтүп кетти. Бирок режиссёр Сүйүн Откеевдин сунушу менен балдар үчүн өз салымымды кошуп, бул тасмага тартылдым” деди ал.

Тасма эки жыл ичинде тартылып бүткөн. Анда миграция маселеси, жарым жетим балдардын турмушу сыяктуу коомдогу актуалдуу маселени баяндайт. Балдардын айрымдары алыстагы ата-энесине куса болсо, кээ бири туугандарынын колунда калып, мээримге муктаж. Режиссёр бул тасмасы аркылуу балдарга тарбия берүүдөгү ойлорун билдиргиси келгенин айтат.

"Коомдогу актуалдуу маселени фантастика аркылуу чагылдыргым келди. Интернеттин күнүмдүк жашообузга келиши менен балдарга тарбия берүү, аларга мээрим төгүү, сүйүү деген милдеттерден алыстап баратабыз. Дагы бир маселе – миграция. Балдарыбызды ишенип таштап кеткенибиз менен, кандай маселелерге дуушар болуп, коомдо өгөйлөнүп жатканын биле бербейбиз. Балдардын ачык айта албаган, ичине каткан үндөрүн тасма аркылуу бердик",- дейт Откеев.

"Жетикс" – мээримге зар балдардын сезимсиз планетадан келгендер тарабынан уурдалышы жана аларды куткаруу тууралуу тасма. Анда дайынсыз жоголгон балдарды жогорку күчкө ээ 5 бала кантип куткарып, сезимсиз планетаны жок кылганы баяндалат.

star@super.kg