Кыргызстан социал-демократиялык партиясына бийлик тарабынан кысым болуп жатканы буга чейин сөз жүзүндө айтылып келсе, эми далилдүү фактылар ачыктала баштады. УКМКнын Жети-Өгүз райондук бөлүмүнүн башчысы Таабалдиевдин ушул эле райондогу паспорт столунун жетекчисине жазган катынын көчүрмөсүн КСДП партиясынын расмий өкүлү Кундуз Жолдубаева жарыялады. Бул катта Табалдиев каттоо мекемесинен 18 адам жөнүндө чукул арада маалымат жөнөтүшүн талап кылган. Катта көрсөтүлгөн жарандар КСДПнын Ысык-Көл облустук конференциясына Жети-Өгүз районунан катыша турган делегаттары экени айтылды.

Жолдубаева “делегаттар тууралуу мындай маалыматтар укук коргоо органдары тарабынан Ысык-Көл облусунун башка райондорунда да чогултулуп жатат” дейт. Аталган партия УКМКнын бул аракетин КСДПнын 18-съездин өткөрүүнү үзгүлтүккө учуратуу жана кысым катары кабыл аларын жарыя кылды.

УКМКнын басма сөз катчысы Рахат Сулайманов окуя боюнча ички иликтөө башталганын билдирди.

Эскерте кетсек, 6-апрелде КСДП Бишкекте партиянын республикалык курултайын өткөрмөкчү.

Кубан Жумамидинов
politika@super.kg