Бишкек ЖЭБин жаңылоодо коррупция боюнча айыпталып жаткандардын жактоочулары соттук отурумдар ачык жана акыйкат өтүүсүн камсыздоо өтүнүчү менен Жогорку Соттун төрайымына кайрылышты. Бул тууралуу айыпталуучу, мурдагы өкмөт башчы Сапар Исаковдун жактоочусу Нурбек Токтакунов маалымдады.

Ал соттук алдын ала уктуруулар аяктады, эми соттук отурумдар башталат дейт. Бишкектин Свердлов райондук сотундагы отурум өткөн зал тар болгондуктан, ага жактоочулар менен күзөт кызматы эле батат. Бул абал соттук отурумдун ачык өтүүсүн камсыздабай жатат.

"Эгер сот залына жалпыга маалымдоо каражаттары менен айыпталуучулардын туугандарын киргизсек, зал адамга толуп калат да, тыгылыштан жактоочулар иштей албай калып жатабыз. Жактоочулар бул ишти кененирээк залда кароону өтүнөт. Процесстин жабык өтүүсү – такталбаган маалыматтардын жана коомчулукта туура эмес пикирлердин тарашына шарт түзөт. Эгер мамлекеттик айыптоочулар өздөрү коюп жаткан күнөөгө ишенсе, анда алар муну далилдөө үчүн соттук процесстердин ачык болушуна, жалпыга маалымдоо каражаттарынын өкүлдөрү, айыптоочулардын туугандары баткан залда өткөрүүгө кызыкдар болушу керек",- дешет жактоочулар.

Кубан Жумамидинов
politika@super.kg