«Азаттыктын» кабарчысы Ыдырыс Исаковду сотко берген ишкер Жалил Атамбаев доо арызын кайтарып алды. Ишкердин жактоочусу Шумкарбек Абжапаровдун айтуусу боюнча, доо арызды 7-майда Ош шаардык сотунан кайтарып алган. «Мусулмандардын ыйык Орозо айында кечиримдүү бололу, соттошпойлу, кечирдим деп Жалил Атамбаев доо арызын кайтарып алды»,- дейт Абжапаров.

Бир канча апта мурун Исаков салыктардан качкан ишкерлер тууралуу иликтөө жарыялаган. Анда көмүскө экономиканын артында жылына бюджетке 40 миллиарддай сом түшпөй жатканы айтылат. Иликтөөдө ишкер Жалил Атамбаевге тиешелүү бизнестер жана салыктан качкан күмөндүү схемалар баяндалган.

Макала жарыялангандан соң Жалил Атамбаев журналисттин үстүнөн Ош шаардык сотуна кайрылып, 50 миллион сом өлчөмүндөгү моралдык доо акы өндүрүп берүүнү суранган. Мындан тышкары Атамбаев иликтөөдө коррупциялык схемалар тууралуу айтып берген Мирлан Маматов менен Марат Сайбидиновду да сотко берип, алардан 5 миллион сом өндүрүүнү суранган. Бул эки адамга жазылган доо арыз да кайтарып алынган.

Адилет Керимбек уулу
politika@super.kg