Нарк-насилдүү, сөзмөр, кайраттуу... Өмүрбек Текебаевдин апасын ушундай элестетчүмүн, жаңылбаптырмын. Базар-Коргон районунун Акман айылына барып, Тилла эне менен саясатчы Текебаев басып келе жаткан жол тууралуу баарлашып кайттык. “Балам, туугандары чогулуп алып Текебаевди мактай бериптир дебесин. Айылды кыдырып, калыс сөздүү адамдардын да пикирин уга кет” деп кеңеш айтты. Бул дагы жөнөкөй эне айта турган сөз эмес.

Арыбаңыз, Тилла эне. Өмүрбек Чиркешовичтей мыкты уулдун апасы менен баарлашуу буюрган экен, алдыңызда отурам. Уулуңуздун саясаттагы баскан жолу сыңары, бала кези да кызыгуу жаратат. Бала кезинде Өмүрбек байке кандай эле? Келечегин кандай элестетер элеңиз?

– Сиз жасаган кайсы тамактарды жакшы көрүп жечү?

- Мантыны, куурманы жакшы көрөт. Анан “сиз жасаган камыр палоо жакшы, апа” дей берчү. Тооктун этин 2-3 күнгө туздап, жакшы көргөн тамагын жасап берер элем. Шорпону анча жактырчу эмес.

Мектепте жакшы окуган балдарды кыздар жакшы көрөт эмеспи. Өмүрбек байкени да жакшы көргөн кыздар көп беле?

- Негедир Өмүрбек кыздарды жаман көрчү. Мектепте такыр кыздар менен бир партага отурбай койду. Үйгө килем соккону келген кыздарды кетиргиче шашчу. Азыр эми өзүнүн кыздарын аябай жакшы көрөт (күлүп). Жогорку окуу жайды бүтүп келгенде “эми үйлөнүшүң керек” десем унчукпай кутулуп жүрдү. Жалал-Абадда иштей баштаганда кыздар үйгө келе башташты. Майлуу-Суудан, Оштон, айтор... Балам экөөбүз бир бөлмөдө жатабыз, бир күнү “балам, эмне иши бар билбейм, үйгө кыздар келе баштады” десем, “апа, үйгө киргизбеңиз, алардын эмне максаты бар экенин ким билет?” деди. Кийин Москвага иштегени кетти (ред.: Текебаев 1991-жылы СССР Жогорку Советинин мүчөлүгүнө шайланган). Бир күнү “биздин иш быйыл жоюлат экен. Ага чейин бир келип кетсеңиз” деди. Атасы өтүп кеткен эле. “Эгин бышып калды, жем тартыш керек. Жумуштар бүтпөй калат” десем жини келип кетти. Келиним Айгүлдү ошол жактан тааптыр. "Киного барсам да, китепканага барсам да жолугуп кала бердик, жактырып калдым" деди. Айгүлдү биринчи жолу Ошко кудачылыкка барганда көрдүм.

– Өмүрбек байкенин атасы тууралуу айтып берсеңиз...

- Атасы менден 9 жаш улуу, түптүз жүргөн кыйын киши эле. Тектүү жердин урпагы, Жолборс казынын неберелеринен болот. Китеп, журналды абдан көп окуган. Жерден китептин алакандай кагазын таап алса “үф” деп үйлөп туруп окуп чыгат эле. "Эмне кыласың минтип?" десем “бул кагазда да көп нерсе бар” дечү. Кайненем 1 уул, 1 кыздуу болгон экен. Кызы турмушка чыккан соң баласы апам жалгыз калат деп окубай калыптыр. Мугалим, мектеп директорлору, раистер келип кеңеш сурачу. Өмшөгүм (ред.: уулу Өмүрбекти айтып жатат) мага окшош, бою да орто. Башка балдарым атасын тартып далылуу, сөөктүү.

– Өмүрбек байке мектепте мугалим кезинде окуучуларын пахта терүүгө жөнөтпөй коюп, өлкөнү дүрбөлөңгө салганы белгилүү. Ошол окуяны сиздин оозуңуздан уксак...

- Ооба, окуучуларын пахтага жөнөтпөй койду. “Мындай болбойт, апа, эмне кылса кылсын, балдарды пахтага жибербейм” деди. Бир күнү эшикте отурсам Базар-Коргон районунун акими келди. Аты эсимде жок, аял киши болчу. Мени колхозчу аял, алдасам көнөт деди окшойт. “Балаңызда сөз жок. Бирок планды артка тартып, балдарды пахтага жибербей койгону чатак болду” деп баштады. Сөзүн бүткөн соң короонун ичин айланта карап “жериңиз кенен экен, дагы бир үй салып берели” деди. Ошондо мен “балам, биз бешене тер менен оокат кылган адамдарбыз. Бир үйүбүзгө эле ыраазыбыз, ашыкча оокаттын кереги жок. Балам жаш бала эмес, өзү билет” дедим. Кийин чогулушта сельсоветтерге “алдана турган кемпир эмес экен” дептир. Анысын бизге сельсовет айтып келди. Элге иши жакканы үчүн кийин баламды 6 жолу депутаттыкка шайлашты.

– Уулуңуз саясаттын ысык-суугун аябай көрдү. Саясатка жаңыдан аттанганда балаңызга кандай кеңеш айттыңыз эле?

- Адегенде “этият бол” дегем. Кийин “депутат болоруң менен эле светтин баасын арзандат, “алтын комбинат” деп эмне кыласың? Эл катары эле иштей бербейсиңби” десем “апам болсоңуз да тескери жолду айтпаңыз. Жаман көрөбү, жакшы көрөбү, айта берем. Эл мени ошол үчүн шайлаган” деди. Ушундан кийин уялып, экинчи антип айтпас болдум. Бүгүн эми жебеген самсага пул төлөп отурса жаман экен, карыганда мага оор тийди. Учактан түшүрбөй кармап кеткенин айтсаң... Ошол түнү уйкум качып, ойгонуп алдым. Тообо кылдым, бирөө менен эле урушкум келет. Э Кудай, карыганда шерменде кыла көрбө деп коюп отурам. Жерге жарык түшкөндө үйгө сиңдим келди. Артынан улуу кызым келип калды. Учурашканда өпчү эле, бул жолу өппөй жогору өтүп кетти. Телевизорду күйгүзсөм уулумду кармаганын көрсөтүп жатыптыр. "Сизге айта албай жаттык эле, көрүп алдыңыз" деп калышты үйдөгүлөр.

– 21-августта уулуңуз Өмүрбек Чиркешовичтин иши Жогорку Сотто кайра каралганы жатат. Бул жолу кандай ойдо турасыз? Уулуңуз акталып чыгат деген үмүтүңүз барбы?