16-августта мурдагы премьер Сапар Исаков ден соолугу начарлап, УКМКнын тергөө абагынан ооруканага жеткирилди. УКМКнын маалыматына таянсак, дарыгерлер Исаковго «кыр арка омурткасындагы кан айлануу бузулган» деп диагноз коюшту. Учурда Улуттук госпиталда, дарыгерлердин көзөмөлүндө жатат. Адвокаты Нурбек Токтакуновдун айтымында, учурда абалы канааттандырарлык. Ооруканада канча күн жатары азырынча белгисиз.

Сапар Исаков премьер кезинде өкмөттүн маалыматтык саясат бөлүмүн жетектеген Гүлнура Төралиева 20-августта билдирүү жасап, Исаковдун абалы начар экенин жарыялады. «Сапар Жумакадыровичтин абалы жакшы эмес. Отура албайт, өңү кубарып кеткен, алсыз. Жөндүү диагноз коюша элек. Сапар Исаковго жөндүү медициналык кароо жүргүзүүнү суранам»,- дейт Төралиева.

Кыр арка омурткасындагы кан тамырлардын синдрому – бул омуртканын ичиндеги тамырларда кан айлануунун бузулушу. Бул синдром жаш куракта инсульт алуунун бирден-бир себеби болуп саналат.