24-сентябрда Бишкекте Кыргыз-Түрк бизнес форуму өттү. Өлкөлөрдүн экономикалык байланышы талкууланган иш-чарага президент Сооронбай Жээнбеков да катышып, сөз сүйлөдү.

Президент Түркия эгемендүү Кыргыз өлкөсүнө 600 миллион доллардан ашык түз инвестиция салганын билдирди: «Кыргыз-Түрк соода-экономикалык мамилелери жакшы ыргакта өнүгүп жатат. Былтыр Түркиядан жалпысынан 93 миллион доллардан ашык инвестиция келген. Түркиядан Кыргыз мамлекетине эгемендик алгандан бүгүнкү күнгө чейин тартылган түз инвестициялардын көлөмү 600 миллион доллардан ашат».

Президент Кыргыз-Түркия ортосунда экономикалык дарамет толук колдонулбай жатканын эскертип, өлкөлөр ортосундагы соода жүгүртүүнүн көлөмүн 400 миллион доллардан 1 миллиард долларга чейин жеткирүү боюнча Түркия президенти Режеп Тайип Эрдоган менен сүйлөшкөнүн билдирди.

Айрым эксперттер бийлик Түркияны инвестиция салууга чакырганы менен, инвесторлорго шарт түзүп бере албай жатканын айтып жатышат. Мисалы, Түркиянын каражатына курулган Бишкектеги Кыргыз-Түрк ооруканасы. Келишимге ылайык, оорукана 2017-жылы ишке берилмек, бирок бериле элек. Саламаттык сактоо министрлигинин маалыматына таянсак, эки өлкө оорукананы иштетүү шарттары боюнча бир пикирге келе албай жатат.

Өлкөдө инвесторлорго шарт түзүүдө, ошол эле учурда улуттук кызыкчылыкты коргоодо мүчүлүштүктөр көп экени айтылып келе жатат.

Кубан Жумамидинов
politika@super.kg