22-сентябрда Жети-Өгүз районундагы Саруу айылдык кеңешине депутаттарды мөөнөтүнөн мурда шайлоо өттү.

Кызык шайлоого жакын башталды. Алдашев айылынан талапкер болгондор «Жергиликтүү кеңештерди шайлоо жөнүндө» мыйзамга киргизилген өзгөртүүлөргө каршы экенин билдирип, президент Сооронбай Жээнбековго жана Жогорку Кеңештин төрагасы Дастанбек Жумабековго жамааттык кат жөнөтүшкөн. Алар мыйзамдагы «жергиликтүү кеңештердеги депутаттардын 30 пайызы аялдар болсун» деген өзгөртүүгө макул эмес экендиктерин билдиришкен. Аял-эркектердин тең укуктуулугун, гендердик теңдикти кабыл алгысы келбеген жергиликтүү кеңештин депутаттары мындай абалда кантип иштеп, маселе чечери кызык.

Эскерте кетсек, ушул жылдын 13-августунда президент Сооронбай Жээнбеков Кыргыз Республикасындагы шайлоо жана референдум өткөрүү эрежелерин аныктаган мыйзамдар топтомуна кол койгон. Ал мыйзамды Жогорку Кеңеш 2019-жылдын 27-июнунда кабыл алган.

Ал мыйзамдагы негизги өзгөртүү «жергиликтүү кеңештердеги депутаттардын 30 пайызы аялдар болсун» деген норма.

Кубан Жумамидинов
politika@super.kg