Кызык экен

Кытайлык сүт фермасынын ээси 53 жаштагы Го Фэндин эмчеги 44 жашынан кийин эле өсүп, чоңоё баштаган. Эркек өзү да семирип бараткандыктан, эмчегинин чоңойгонуна алгач анчалык маани берген эмес. Бирок билинбей жүрүп отуруп, анын эмчеги 12-өлчөмгө өсүп жетип, “секс-бомба” атала баштайт. Ошондо гана Го «аялга айланып баратамбы?» деп дүрбөлөңгө түшүп, дарыгерлерге кайрылат. Медиктер текшерип көрүп, анын эмчегинин чоңоюшуна залалсыз шишик (гинекомастия) себеп экендигин аныкташат. Гинекомастия адам семиргенде организмдеги гормондордун өзгөрүшүнөн улам келип чыгат. Акырында врачтар Гого операция жолу менен шишикти алууну сунушташат. Ошентип операция 5 саатка созулуп, жакшы жыйынтык менен аяктады. Хирург өзүнүн 30 жылдык иш тажрыйбасында мынчалык чоң эмчектүү эркекти жолуктурбаганын айтат.

Балдардын семирүү эпидемиясы учурда кыздарды 7-8 жашында эле жетилүүгө алып келүүдө. Эксперттер мунун себепкери толук кыздардын организминдеги май ткандары деп көрсөтүшөт. Анткени май ткандары гормондордун көбүрөөк бөлүнүп чыгышын шарттайт. Бул болсо эрте жетилүүгө алып келет.
АКШнын окумуштуулары ар бир 10-кыз 7 жашынан эле жетилерин тастыкташууда.
Мындай эрте жетилүүнүн эң жаман жагы болуп эмчектин рак оорусунун жана жүрөк-кан тамыр дарттарынын келип чыгышы эсептелет.
Доктор Жереми Аллегров: “Эрте жетилген кыздар көп санда болбосо да кездешет. Алардын этек кири да эрте келет. Андыктан энелер кыздарынын келечегинен тынчсызданышып, бизге көп кайрылышат”,- дейт.
Эрте жетилүү боюнча артка кайрылып көрсөк, 1930-жылдары эрте жетилди деген кыздардын жашы 15 жашты түзгөн. 1950-жылдары бул көрсөткүч төмөндөп, 11-12 жашты түзүп калган. Эми минтип 7-8 жашка чейин түшүүдө.

Канымжан Усупбекова
kenesh@super.kg