Кыргызстан 7-апрелден кийин дүйнөлүк коомчулуктун көңүл чордонун экинчи ирет ээлеп, анда биздин аттуу-баштуу саясатчылар негизги каарманга айланышты. Биз бул жолу алардын аткарып жаткан ишине эмес, кийген кийимине көңүл буралы дедик. Албетте, өзүбүз эмес, атайын адистин жардамы менен.

“КИЙИМГЕ ДА МААНИ БЕРИШСЕ...”

Жогорудагы саясатчылардын кийимине саресеп салган адис Гуля Алмамбетова айрым саясатчылардын кийимин көзөмөлдөө менен алектенет. Ал өзүнүн тажрыйбасынан улам төмөнкүдөй кеңеш берет:

• Эгерде сызыкчалары бар костюм кийсе, анда ага кыйшык сызыкчалуу, же чакмак сүрөттүү галстук тагынуу керек.
• Сызыкчалуу костюм мода болгону менен, ал баарына жараша бербейт.
• Эгерде көйнөк чоң болсо, отурганда галстуктун байлоосу бошой баштайт.
• Саясатчылар шайлоо алдында түрдүү үгүт иштерине катыша башташат. Алар көбүнчө ЖОЖдорго барышат эмеспи. Эгерде чет тилдер, юридикалык факультетинин студенттерине барса, анда костюм-шым, экологияда окугандардын алдына барса, анда чочулабай эле жынсы шым кийип алгандары оң. Жыйылган топтун мүнөзүнө жараша кийингени туура демекчимин.
• Тышкы көрүнүшкө көңүл бөлгөн өтө маанилүү. Буга акчаны үнөмдөө туура эмес. Мисалы, 30-50 миң доллар турган машинадан түшүп келе жаткан саясатчынын "Дордойдон" кийинип алганын элестетиңиз. Алар көйнөктү сатып алуу да өзүнчө чоң жумуш экенин билиши керек. Эл көзүндөгү адамдар кийимге олуттуу маани бербегени туура эмес. Ошондуктан ишинен сырткары алар тышкы көрүнүшүнө да көңүл бөлүп, тиешелүү адистерден кеңеш алып турушса дейм.

(Уландысы кийинки сандарда)

Эльвира Караева
koom@super.kg