Ысык-Көлдүн Жети-Өгүз районундагы 310 окуучуга Исмаил Матраимов атындагы фонд стипендия берди. Булар ата-энесиз, атасы же энеси жок жана аз камсыз болгон үй-бүлөлөрдүн балдары экени айтылды. Стипендияны Жогорку Кеңештин депутаты Искендер Матраимов тапшырды.

"Жардамга муктаж окуучуларга стипендия берүү боюнча "Исмаил Матраимов" фондуна "Дүйшөн ата" фонду тарабынан сунуш түшкөн. Биз сунушту карап, алардын демилгесин колдоп берүүгө макул болдук. Өткөн дем алыш күнү Жети-Өгүздөгү мектептерден чогулган 310 окуучуга стипендия тапшырып кайттым. Көңүл бурууга муктаж балдардын көз жашын сүртүп, бооруна кысып, мээрим төгүп, алардын маселесин көтөрүп, биздин фондго сунуш кылгандарга ыраазычылык билдирем”,- деди Искендер Матраимов.

Ал эми аталган фонддун директору жардамга муктаж балдарга каражат издеп далай эшикти какканын айтат. “Азыр эч кимдин эч ким менен иши жок заман, бирок бул киши биздин көйгөйлөрдү укканда кайдыгер карабай, колун сунду. Бул колдоо бизди абдан кубандырды",- дейт фонд директору.

Автандил Добулбеков
politika@super.kg