Бардык уйку бир тең, таңкы уйку бир тең. Чарчаган күндүн эртеси канчалык жетиштүү уктасаң деле эртең менен ойгонуп дароо туруп кетүү оор болгон учурлар көп. Таттуу таңкы уйкудан сергек ойгонуу үчүн оңой кадамдарды санап беребиз.

Эрте туруш үчүн эрте жатыш керек! Окумуштуулардын изилдөөсүнө таянсак, уйку канышы үчүн 7-9 саат уктоо жетиштүү. Эртең менен жумушка канчада туруу керек экенин эсептеп алып өз убагында уктоого камыныңыз.

Уктаар алдында бардык электр приборлорун жана жарыкты өчүрүп жатуу керек. Караңгы бөлмөдө уйкуну келтирүүчү гормондор көп иштелип чыгып, уйкуга тарта баштайт.

Бөлмөнү таза кармап, желдетип, арча түтөтүп же жыпар жыттуу эфир майларын камтыган шам жагыңыз.

Жатарда тоюп албаңыз! Кесепеттерин баарыбыз эле жакшы билебиз: тамак сиңирүү оор болуп уйку бузулат, көңүл айланат, адам уктай албай кыйналат ж.б.

Эртең менен ойгонгондон кийинки алгачкы 5 мүнөт күндүн кандай өтүшүнө зор таасир этет. Мисалы, бул 5 кадам:

1. Көздү ачканда эле кечээкиден калган көйгөйдү же бүтпөй калган ишти ойлонбой, жакындарыңыз, жакшы күндөр жана бүгүн эмне кызыктар күтүп жатканын ойлонуңуз.

2. Керилип-чоюлуңуз. Бул организмди ойготот. Терең дем алып кычкылтек менен организмди азыктандырып баштаңыз.

3. Желке, чыкый, каштын айланасын, кулактын айланасын укалаңыз. Бул башта кан жүгүрүүнү тездетет.

4. Алакандарды бири-бирине сүргүлөңүз. Бул кан айланууну жакшыртат.

5. Эми акырын тура баштаңыз. Төшөктөн дароо көтөрүлүп кетпей, алгач бир аз отуруп, андан ары туруу керек. Ашканага кирип бөлмө температурасындагы суудан 1 стакан ичиңиз.

Суу ичкенден кийин жуунуп-таранып алып, тамактанууга өтүңүз. Эртең мененки суу ашказанды тамактанууга даярдайт. Эртең менен тамактын майлуусун жебеңиз. Пайдасыз азык менен эптеп ашказанды толтуруп койгон адамдын ашказаны оорлошуп, сиңбей түшкө чейин кыйналып, кайра уйкусурай баштайт.

Убакыт болуп калса бөлмөнү желдетип алып, стандарттык көнүгүү болсо да кыймыл-аракет жасап коюңуз.

Эми жылмайып алып ишиңизге жөнөңүз. Сизге ийгиликтүү күн!

Гүлжан Асанкожоева
kenesh@super.kg