Өлкөдө COVID-19 илдетине каршы чаралар кайрадан көңүл чордонуна чыгууда. 28-сентябрда Баткен облусунун аймагы боюнча кабыл алынган чечимдер кайра каралып чыкты. Аталган облустун тургундары коомдук транспортторду жана мал базарларды кадимки режимде иштетүүнү суранышкан. Облустук штаб сураныч орундатылганын, бирок бет кап тагынуу, той-аштарды өткөрбөө талаптары күчүндө калганын билдирди.

“Базарларда, соода борборлорунда, коомдук жайларда санитардык талаптардын сакталышы боюнча күн сайын рейд жана дезинфекциялоо иштери жүрөт”,- дешти республикалык штабдан.

Ош шаардык мэриясы да шаарда санитардык эрежелердин сакталышына талаптар катуулап, текшерүү күчөй турганын билдирди.

Өлкөдө COVID-19 илдетин жуктуруп алгандардын саны кайра өсө баштаганы айтылып жатат. 29-сентябрга карата бир суткада өлкөдө 167 адамдан аталган оору аныкталды. Мунун 55и Баткен аймагында катталды. Өкмөт жалпы өлкө боюнча карантиндик чектөөлөрдүн катаалдашы же өзгөрүүсүз калышы жарандардын санитардык эрежелерди канчалык так сактаганынан көз каранды экенин билдирүүдө.

Жолдубек Качкынбаев