Баткен облусунун Үч-Дөбө айылында 25-октябрь күнү Кыргыз-Тажик жарандарынын ортосунда чыр чыкты. Мамлекеттик чек ара кызматынын маалыматына ылайык, Үч-Дөбө айылындагы такталбаган аймакта Тажикстандын жарандары суу алып өтчү түтүктөрдү орнотуу иштерин жүргүзүп жатканда Кыргыз тараптан чек арачылар барып, эскертүү беришкен. Бирок Тажик жарандары эскертүүнү укпай, оозеки кайым айтышууга барышкан. Кыргыз чек арачылары өз учурунда чатактын күчөп кетпөөсүнүн алдын алып асманга эскертүү иретинде ок атышкан.

Азыркы тапта аталган тилкеде курулуш иштери токтотулду. Окуяга байланыштуу 26-октябрда эки тараптын жергиликтүү бийлик өкүлдөрү жолугуп сүйлөштү. Ага Баткен облустук администрациясынын аппаратынын укук, тартип, коопсуздук жана өзгөчө кырдаал бөлүмүнүн башчысы Мусурманбек Турсуматов, Баткен районунун акиминин орун басары Адыбек Набиев, Тажикстандын Исфара районунун акиминин орун басары жана эки тараптын күч түзүмдөрүнүн башчылары катышты. Абал облус башчысынын жана күч түзүмдөрүнүн көзөмөлүндө, учурда кырдаал туруктуу деп айтылды.

Маалыматка таянсак, окуядан жабыркаган жарандар жок.

Жумабай Акимов