“Мамлекеттик чек ара кызматын Улуттук коопсуздук мамлекеттик комитетине өткөрүп берүү керек”. Мындай пикирди 2-ноябрда Баткен облусунда эл менен жолугушууда президенттин милдетин аткаруучу, премьер-министр Садыр Жапаров айтты. Чек ара талашы коңшу өлкөлөр менен сүйлөшүү жолу аркылуу чечилерин белгилеп өттү. Жапаров облустагы Көк-Таш – Тамдык жана Ак-Сай – Рават унаа жолдорунун курулушун көрдү.

Ал Баткен облусунда эпидемиологиялык абал курч экенин белгилеп, жергиликтүү жетекчиликке ооруканаларды бардык дары-дармектер жана медициналык кызматкерлерди коргонуучу каражаттар менен камсыздоону тапшырды. "Элдин жашоосу, чоңдордун бул аймакка дээрлик аз келиши, бүтпөгөн чек ара чырлары менин көңүл чордонумда дайыма турат. Баткен – Кыргыз өлкөсүнүн картасындагы эң алыскы жана 2 мамлекет менен чектешкен саясий стратегиялык аймак. Ошондуктан мамлекеттик чек аранын сакталышы үчүн Баткен облусуна өзгөчө көңүл бурууга милдеттүүбүз",- деди премьер-министр.

Жумабай Акимов